5歲女童虐殺案 繼母出庭自辯 哽咽謂「佢點錯都好,只係5歲大嘅小朋友」

更新時間 (HKT): 2021.03.24 18:46

5歲女童疑遭虐待致死,其8歲胞兄亦受虐,兩童的親父及繼母被控謀殺等罪受審。繼母下午出庭自辯,哽咽承認對Z的死要負起最大責任,「佢點錯都好,佢只係5歲大嘅小朋友」。她指兩童不受教,親女兒則「好乖好生性」,處處為母親著想;但當談及親女曾供稱死者被拋上天花撞到發出「碰碰」聲時,繼母即指親女「比較鍾意認叻、誇大」。

案中兩名受害兒童的繼母否認謀殺罪。她今供稱,在首被告、即兩童親父家中居住時,與奶奶意見不合,遂決定與三名子女搬到母親家中居住,「搬咗出去就開開心心咁成長,諗住有屬於自己嘅家」。但她最終發現未能如願以償,因搬屋後面臨種種壓力,包括管教子女的問題、經濟緊絀及有做不完的家務等,令她壓力很大。

只打過親女一次手掌

提及兩童傷勢的由來,繼母坦承所有傷痕均由自己及丈夫以藤條或拖鞋毆打而成。繼母指男童X及女童Z不聽話,「鬧又鬧過、講又講過」。她承認除了體罰兩童外,亦試過沒有提供食物給他們或帶他們就醫。

辯方問:「對於Z嘅死,你有乜嘢想講?」繼母哽咽謂:「對Z我要負起最大嘅責任。」她自言負責照顧兩童,「佢點錯都好,佢只係5歲大嘅小朋友,而我係個大人,所以要負責任。」

繼母承認只打過親生女兒Y一次,打她的手掌。被問及為何有差別對待X及Z,她回答:「因為Y真係好乖、好生性。」她指Y不需她操心課業。她又稱讚Y「好多時會為我著想、為我諗」,並會幫母親處理微小的困難。繼母續指,Y明白賺錢的辛酸,會選擇較便宜的橡皮擦。

另一方面,她指替Z洗澡時「嗌極佢都唔肯郁」,即使哄也沒用,「拖佢佢喺度嗌」,要花很長時間說服Z,Z才願意洗澡。

親女指繼妹被撞至發出「碰碰」聲 繼母指或混淆了她本人的叫聲

辯方問繼母何時發現Z右膝後方的潰瘍,她指看見Z搲褲子上的啡色漬,遂脫掉對方的褲子查看,發現Z傷口上「有塊皮浮起咗」,該皮塊呈啡色、發出臭味並有液體滲出。她以消毒藥水清洗後,該啡色的皮塊變小了,但它扯著四周的皮膚,導致「啲肉越嚟越損」,她遂每天以消毒藥水清洗傷口兩至三次。

繼母其後發現Z身上有縱橫交錯的藤條印,是丈夫以藤條打Z造成。她自言12月後就沒再打過Z。

談到Z於死前一日玩「飛高高」,繼母解釋丈夫只是抱著Z腋下,「會有少少離一離手,只係離開一啲啲」。辯方問繼母是否曾建議丈夫將Z的頭部撞上天花板,她辯稱只是說笑。

辯方續指,Y曾供稱Z被撞到發出「碰碰」聲,繼母則指當時有模仿「碰碰」聲,Y或將她的叫聲當作事實,並形容Y「比較鍾意認叻、誇大」。聆訊繼續。

【案件編號:HCCC28/20】

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner