隔牆有耳:阿塗x民女 出童書抗洗腦(李八方)

更新時間 (HKT): 2021.03.24 02:00
■阿塗筆下嘅角色變成可愛figure,一齊搞登山讀書會。

教育局長楊潤雄話向全港中小學派套《我的家在中國》書冊做輔助教材,點知俾網民寸爆,話佢家在中國,但就送晒仔女去外國,唔使接受愛國愛港教育。當港共官員全力配合北京,要下一代填鴨式愛國,咁點將追求民主自由嘅種子傳承畀下一代?答案就係要更加落力靠自己同民間力量!有民間組織就發起眾籌,自發搞兒童書,希望教育香港下一代真正嘅民主自由。

義賣公仔為612基金眾籌

「香港民主女神團隊」前日宣佈,佢哋會同漫畫家阿塗合作,製作首季一套12本嘅《登山讀書會》兒童書,希望可以「由淺入深引導對民主自由的思考」,同「將香港民主運動流傳於世」。

阿塗筆下創作出唔少同社會運動有關嘅可愛角色,好似民女、靜靜雞、連儂仔、獅鳥同銀婆婆,佢哋會喺呢套兒童書用輕鬆有趣方式去講返香港人嘅故事,引發讀者討論民主自由,團隊仲形容係「教育下一代必備」讀物。八方相信,漫畫唔只可以凝聚港人,仲可以有助跳出同溫層打動更多人。

呢個項目開始咗眾籌集資,達標就可以出版3,000套童書,仲會有模型公仔義賣,而且係百分百香港製造,產品售價嘅三成就會捐畀612人道支援基金或者參與嘅店家,務求可以回饋運動,成為對抗打壓嘅本錢。

李八方

手機用戶請按此放大圖表

一格照片,一個故事,Follow蘋果Instagram!
BannerBanner