47民主派被控︱長毛身陷囹圄仍憂患癌戰友古思堯狀況 胡志偉精神好已調節心態

更新時間 (HKT): 2021.03.25 13:51
到場探望「長毛」梁國雄的劉慧卿指,長毛精神不錯,但非常關心古思堯的情況。本報記者攝

因參選民主派初選被捕的47人,除少數人獲准保釋外,大部份仍還柙於荔枝角收押所。今早(25日)繼續有被捕者親屬及戰友到場探訪,民主黨劉慧卿引述「長毛」梁國雄指,他非常關心已相識逾30載、目前同涉控罪被還押的社運人士古思堯,加上對方患有末期癌症,「識咗咁多年,所以佢係好擔心」。

工黨李卓人、前立法會議員張超雄早上結伴,分別探望胡志偉及譚得志。李卓人指,胡精神非常好,「佢話入咗嚟一個禮拜之後就調節晒」。他續指,今早除討論自己涉及的案件外,「佢亦都講吓佢而家嘅精神狀態,同一期數有其他還柙民主派,大家出嚟放風可以見吓面,呢樣好緊要,大家喺裏面唔會覺得自己係孤獨」。李又指,近日天氣突然轉涼,憂胡「係咪要沖凍水涼」,其後才得知原來收押所有暖水浴,但亦擔心未來天氣轉熱會更不好過,「佢(胡)就話間房啱啱好有風扇,然後有鐵枝(窗)喺度,有風吹入去,相信都面對到」。

長毛憂患癌古思堯身體狀況

罹患癌疾的社運人士古思堯,因參與前年10.5港島區遊行,被控參與未經批准遊行,目前正被還押中。到場探望「長毛」梁國雄的民主黨前主席劉慧卿指,長毛精神不錯,但非常關心古思堯的情況,「因為佢健康都係有事」,又提及他與古早於1989年遊行中相識,「嗰時古思堯腳傷咗啲、行得慢,但都要行喺前邊,認識咗佢,就識咗咁多年,所以佢係好擔心」。

她又與長毛話當年,指前港督麥理浩曾預言她會坐監,當時長毛稱會前去探監,並會帶香煙,指自己即時拒絕說:「我不抽煙!」

劉頴匡明就7.1立法會案上庭

黃于喬(Emilia)與沙田區議員李志宏結伴探望劉頴匡。黃指,劉明日將就前年7.1立法會案被控暴動罪上庭,故今日都在「諗緊聽日上庭啲嘢」,又指他因還柙生活空閒,不時都會思考「哲學」問題,「『我哋啲區議員入咗嚟,可唔可以用返自己個區議員信封,寄返啲信入嚟呢?』喺度諗埋呢啲嘢」。李志宏則指,今日是首次探望劉頴匡,形容他狀態非常精神,「甚至比起之前見佢狀態更好,可能作息定時咗」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner