疫苗接種︱長期病翁憂事故仍打第二針 中年漢為撐科興指罵記者:日日都有人死㗎啦!

更新時間 (HKT): 2021.03.26 19:42

首批接種科興疫苗的市民今日開始可打第二劑,雖然接連出現接種科興疫苗後死亡或異常事故個案,但似乎並未有打擊「相信科興」的市民信心。大批市民今日到疫苗中心接種第二劑,亦有市民今天到場打第一劑。有六旬的長期病患長者前來打針,指自己打針前已諮詢醫生,認為科興比BioNTech復必泰對自己副作用較少。有市民則直言自己「對祖國有信心」,打針後感覺良好,日前的事故只是「唔好彩」,「日日都有人死㗎啦!唔打針都有人死㗎啦!係咪?」

現年67歲的吳先生今早前來接種第二針,「幾好呀,無乜嘢呀」。他指,接種第一針時護士「手勢好好」,「嗰陣護士同我打,我搲爆頭話,咦你打完喇?打完都直頭唔覺!」,現時身體狀況良好。

吳指,自己有心臟病,需長期服食藥物,因此在打針前亦有諮詢醫生,亦認為科興比BioNTech復必泰對自己較少副作用。他坦言,對於日前接連的接種科興後事故有所擔心,「如果話無呢就呃你嘅,但我覺得一切隨遇而安,唔需要太care(擔心),香港個醫學咁昌明,我相信香港醫管局一定會處理好,唔信有啲咩特別問題」。

他亦不認為會有大批市民退針,「我相信國家嘅藥苗供應畀全世界咁多地方,又經專家審批過,咁擔心來做乜嘢呢?不如擔心吓自己幾時去打仲好」。

75歲的蔡先生亦到場接種第二針,他指接種第一針後未有不適,「你睇吓我今日都準時到,有咩擔心呀?」,笑指日前事故屬「唔好彩囉,我唔驚嘅」,亦未有想過「甩底」,「呢個係個人嘅選擇」。

「對祖國有信心」

施先生今日到中心接種第一針,被問到為何出現接連事故後仍選擇打科興,表示「唔係揀一就二㗎啦,我對祖國有信心呀嘛⋯⋯日日都有人死㗎啦,唔打針都有人死㗎啦,係咪?」

陳小姐亦是前來接種第一針,「好好呀,樣樣都好好」。她指,事故沒有令她對科興失去信心,「我覺得都好正常,你突然間咁多人去打針,咁梗係突然間會有啲人有事,有啲人無事」,認為科興比BioNTech復必泰對身體「反應細啲」,「所以我唔想反應咁大囉,我想正常啲」,故選擇接種科興。

一男子指罵記者問科興事故:夾硬拉埋嚟講!你喺邊度畢業?

有不願具名的男士今早曾就預約輪候時間與中心職員起小爭執。剛打完第一針的他受訪時指「無混亂呀!非常之暢順!你就好混亂喇,《蘋果日報》最混亂!」

被問到日前科興發生接連事故,他激動反問記者「有咩事故呀?你講,有咩事故?」,「日日都有人死㗎啦,你都會病㗎啦!都完全無關係,你夾硬拉埋嚟講!」並指罵記者「你係咪記者嚟?你喺邊度畢業?」。他指,認為科興較安全,「有乜問題呢?佢用舊嘅滅活技術,新嗰啲反而信唔過喎,新嗰啲搵你哋做白老鼠咋喎,死亡率特別高㗎喎,完全無考慮過」。

-----------------------------

《蘋果》英文版免費試睇:了解更多

英文版已登錄《蘋果》App,立即下載/ 更新iOS / Android

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner