隔牆有耳:何俊仁獲鮑德文自由獎 
與港人互勉︰繼續堅持(李八方)

更新時間 (HKT): 2021.03.26 02:00
■仁哥30年來致力人權工作,但遺憾香港人權狀況極速惡化。

香港人權狀況極速崩壞,公民權利同自由被極權剝奪得所剩無幾,喺最壞嘅時代,有香港人因長期投入人權同法律工作獲國際認同。本身係律師嘅民主黨前立法會議員何俊仁獲美國人權組織Human Rights First頒發2020年羅傑鮑德文自由獎。

羅傑鮑德文係美國公民自由聯盟領袖,亦係國際人權聯盟創辦人。疫情下仁哥冇去美國領獎,雖然佢早知得獎,但非常低調,直到個獎近日寄到港,佢先同八方分享感受。本來獲獎應該開心,但仁哥直言百感交集。

獎金投放人權工作

仁哥話之所以獲提名,因為30年來都做人權有關工作,包括處理訴訟,喺立法會提出議案,亦有推動社區運動,希望令香港人權進步,遺憾香港人權狀況大插水,仁哥直認現時狀況好艱難,「有啲案有啲律師都唔敢接,睇到國安法之下同律政司啲講法,令人好心寒,但大家更加要有毅力同勇氣,要繼續堅持。」

佢多次強調,呢個獎絕對唔係屬於佢個人,係屬於大家、屬於香港,「呢兩年係見到好多年輕律師、大律師,佢哋好肯接受,相當唔錯。」仁哥透露收到三萬蚊美金獎金,佢已經拎咗出嚟用緊喺人權工作上。

李八方

一格照片,一個故事,Follow蘋果Instagram!
BannerBanner