天下圍中︱港人H&M買衫撐表態 嘲小粉紅「愛國是工作」 中年漢舉牌促道歉

更新時間 (HKT): 2021.03.27 20:55
H&M店外有一名中年男子在店外舉牌,要求H&M向中國人道歉。

內地官媒翻炒時裝品牌H&M抵制新疆棉的舊聲明,引起一眾「小粉紅」呼應抵制,內地以至本港藝人亦紛紛以終止合約來割席表忠。當這場抵制外國時裝品牌的鬧劇越演越烈之際,港人未有緊跟祖國的「愛國」步伐,仍有不少市民到H&M選購衣服。記者傍晚來到H&M尖沙咀分店視察,店內人流頗多,不少到店購物的市民均表示,對內地網民的行為相當反感,且讚揚H&M勇於發聲。不過,店外亦有一名中年男子在店外舉牌,要求H&M向中國人道歉。

與女朋友一同到H&M購物的陳先生,特意透過買衫來支持品牌,指即使中國佔市場比率相當大部份,品牌仍冒着開罪內地市場的風險勇於發聲,大讚H&M有企業良心,反觀香港部份藝人馬上終止合約割席表忠,「啲企業算有良心㗎喇」。

斥小粉紅身體最誠實:最後都會屈服㗎啦

對於小粉紅象徵式的表態,他形容「愛國是工作,外國是生活」,指內地人大多都使用質素較高的外國貨,口裏說愛國,身體卻相當誠實:「你都知㗎啦,以前又話唔用日貨,到最後咪又用日貨;而家又話唔用H&M,到最後佢都會屈服㗎啦,因為外國品牌品質真係好,你估好似大陸嗰啲(嘢品質咁差)咩?」

雖然不敢苟同,他對小粉紅盲目愛國的行為表示理解:「我都戥佢哋慘嘅其實,佢哋不嬲接收資訊都少㗎啦,咁佢哋用開抖音,佢哋始終封閉係咁㗎喇」,指內地人自幼已被洗腦需愛國。他認為,雖然香港亦有開始洗腦愛國的迹象,但他指「最緊要下一代小朋友,你點教你小朋友啦,你自己知咩事就好啦」,認為中國始終與香港不一樣。

斥大陸網民凡事升級至愛國層面無謂

到分店購物的K指,不會形容買H&M衣服是對品牌的支持,但對內地網民以焚燒衣物表態的方式毫不贊同,「唔同地方,唔同文化囉,香港應該唔會有嘅」,認為大陸網民將每件事升級到愛國層面,是相當無謂:「我覺得佢哋自己都辛苦囉,無乜必要囉」,更笑言「自己啲衫嚟㗎嘛,哈哈,嘥咗啲錢」。

K說,不同品牌對表達政治立場相當敏感,認為一家公司選擇發聲,必然有想過要付出的代價,「一個公司,如果佢就住政治而發聲嘅話,係一個勇敢嘅舉動嚟嘅」,認為H&M勇敢發聲一定有其原因。

對抵制反感:佢要做低能嘢無辦法㗎喎

顧客Ben對內地網民批鬥般的抵制相當反感,直言有關行為「低能」:「咁佢要做啲低能嘢嘅,咁無辦法㗎喎」。被問及會否擔心這種風氣蔓延到香港,他直指《國安法》通過後,有很多荒謬事發生,自己亦相當擔憂,「我啱啱都嗌你唔好影我個樣咯,你話唔擔心就假啦」,但指不會為香港的赤化而感到驚訝。

他又認為內地網民相當健忘,相信過一段時間就已忘記抵制H&M等不同品牌:「其實好多次,都唔係第一次係咁樣㗎啦!即係前間唔中又話反日呀,又盛呀,啲小粉紅都係好鍾意㗎啦,之前有一輪我記得好似要燒啲日本車呀,過咗一個月咪又無嘢。」

他形容H&M發聲是一個合理的舉動:「我覺得你發聲係一個合理嘅舉動囉,反而你唔出聲嘅話,就係助紂為虐」,指「有為有所不為」,認為企業放棄中國的市場亦能生存,在世界有很多市場,應有更重要的考量。

中年男店外舉牌 要H&M向中國人道歉

另外,有中年男子在H&M分店門外舉「H&M公開向中國人道歉」紙牌,更示意記者拍攝手上的紙牌。該名男子與一名身穿牛仔外套的男子交頭接耳後離開,其後身穿牛仔外套的男子與幾名男子登上白色私家車離去。

無印良品繼續用新疆棉

各大服裝品牌抵制新疆棉而被一眾「小粉紅」呼應抵制的同時。服裝品牌Muji無印良品反而大力宣傳繼續用新疆棉。有市民因此將寫有「新疆血棉,不了」字卡放在無印良品售賣的衣物上,以提醒大眾勿光顧用新疆棉的商鋪。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner