法政巴絲︱同我吹幾句水呀

更新時間 (HKT): 2021.03.27 17:10
資料圖片

其實,我本來只打算食吓字嘅:「楊明」立萬!因為楊生今次好似都幾威,近嚟單官司大幅提升曝光率,知名度大增呀。但你都知,香港而家可以話係「日日新鮮日日金」嘛,好多事情又令我好想慨嘆,呢個地方真係今非昔比呀。

聽落係咪有啲九唔搭八咁?諗真啲我又覺得唔係喎,其實兩樣嘢係可以拉埋一齊講。首先就係,楊生單官司點解咁吸引大家注意先?

早排有位姓周嘅前藝人都捲入官非仲好似自辯輸咗,但我都只係咁啱得咁橋睇到寥寥數句嘅報道,無見咁多媒體用咁大篇幅去講發生咩事,相信個hit rate都麻麻哋喇。相反,楊生上庭嘅相關報道就有好多人留言分享畀反應,連啲吹水group入面都有人forward㖭。

坊間反應咁唔同,我估係因為楊生公開撐過警啦?

咁點解藝人撐完警然後惹官非,大家會特別關注呢?應該都係因為有人睇完近年其他新聞之後會覺得,撐警嘅人好似有特殊待遇喎,然後佢地就好關心單案會唔會反映咗咁樣嘅情況啦。

而講返被撐嘅警察本身,咦,說好的「獨立檢討委員會」呢?嗱,唔係調查呀,係檢討咋,政府本身都話會搞㗎,點知去到舊年五月,佢就話你聽:無呀,有疫情嘛,一於齊抗疫、撐經濟、保就業!所以好長時間都唔會去檢討啦……不過之後立國安法拉人,叫公務員宣誓,大改選舉機制呢啲嘢,我蠢蠢哋就唔知呢啲同搞抗疫經濟就業有咩關係啦,只係政府明顯有時間去做囉。

然後仲有,而家有啲案畀人告就好似有個新常態咁,打得甩預被上訴,判唔重預被覆核(刑期覆核方面可以睇中大法律國安法關注組整合嘅資料,被覆核嘅裁判官唔係同樣嘅一、兩個嚟),或者會有人拍手叫好,但我見好多人都覺得心痛呀。

咁樣嘅香港——都數唔哂例子喇,因為日日新鮮嘛——係咪今非昔比先?老實講,如果香港唔係而家咁,我估楊生單嘢都唔會咁出位。不過,諗返轉頭咁都ok啦,因為要喺呢個時代裡「揚名立萬」嘅話,唔撐佢嗰邊係唔得㗎嘛,仲可能會賠上自己嘅人生同自由㖭呀——聽落個社會好似好有病咁,係咪?哎呀不過你都係唔好答出聲喇,見字就去坐直飲返杯水啦。

以上內容為作者個人意見。

藍天柳@法政巴絲

法政「巴絲」-法律界的「巴打」和「絲打」。不知絲襪奶茶,配以豆腐火腩飯,會是怎樣的味道?當浪漫的男人,遇上活潑的女孩,又會擦出甚麼樣的火花?讓法律界的朋友一起來,同大家赤裸裸 gossip 呢行嘅八卦趣事。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner