武漢肺炎︱4人1枱「吊命」 飲食業促港府復活節前放寬限聚令

更新時間 (HKT): 2021.03.27 16:57

武漢肺炎疫情漸見緩和,今天更是相隔約4個月以來出現零確診個案,只有6宗輸入個案。因疫情大受打擊的多個業界均指,希望政府可進一步放寬社交限制措施,為各行業留低一絲生機。食肆業界表示,下周將會是復活節假期,屬業內黃金檔期之一,希望可於下周回復正常入座人數。有餐廳負責人亦認為,現時最多只能做「4人枱」生意只屬「吊命」,生意大不如前,難以令小店回本。

香港餐飲聯業協會會長黃家和指,希望政府可於下周放寬限聚,「始終復活節都嚟緊,呢幾日嘅生意都係緊要」。他續指,疫情前的復活節,一般有多達50萬至60萬港人外遊,因此復活節並不算是黃金檔期,惟今年因疫情關係,所有港人均不得外遊,變相是食肆做生意的好時機,「極渴望」可趕及在假期前放寬。

放寬限聚生意復蘇 踏入3月後勁不繼

黃家和指,現時食肆生意仍然大不如前,「農曆(新)年嗰陣有一段時間,因為政府放寬限聚,帶返30至40%(生意),但踏入3月就後勁不繼」。他認為,市民仍然受疫情影響,消費意慾薄弱,「就算出去消費都會節儉啲」,失業率高企亦是因素之一。

黃續指,雖然部份新開的餐廳可吸引年輕客群,生意不俗,「但酒樓晚間生意大部份都唔得,因為無咗宴會、大型活動,只係做返啲散客,生意上影響咪大」,故現時生意仍未「回復當年勇」,仍比以往少至少25%生意。

換氣工程審批程序繁複 批新標準為難業界

政府早前宣佈,5月1日起強制食肆每小時至少換氣6次,或使用符合指定規格的空氣淨化設備。被問到現時「清零在望」,是否證明不必要此措施,黃家和批評政府政策飄忽,「一時又話要『執枱專員』,一時又話要換氣,搞到我哋頭都大晒」。

他指,食環署指引列明,假如要做換氣工程,需經食環署入則、審批再做工程,完成後須經食環署審核,「1個月內點可能16,000幾間食肆可以做得到?我真係𢯎晒頭!」即使使用空氣淨化設備,對生意不佳的食肆而言亦屬一大負擔,但政府未有任何援助,大嘆令他「勞氣」。

黃指,自己對港大微生物學系講座教授袁國勇指,細菌因食肆鮮風量不足而傳播的言論不敢苟同,「餐廳最易接觸病毒嘅係咩呀?係一拎上手嗰個菜單,個個都喺度揭,顧問專家完全無留意到呢啲問題」,認為他並不熟悉行業運作,「一個鐘6次換氣係醫院標準,真係基本上做唔到,唔好為難我哋囉」。

青花亭:不停為輸入case搞晒成個香港 有咩為啫?

黃店「青花亭」早前曾因疫情大大打擊生意率,兩間分店均要停業約一個月。負責人阿Hong指,希望可盡快放寬限聚,「而家2人枱、4人枱咁拍嚟拍去,其實變相都係增加咗人手成本」。即使現時最多可做4人枱亦算「賺返少少」,「但一定點都補唔返之前嗰啲,我哋個本(錢)喺大半年嚟蝕得七七八八,再唔放寬,我哋只係吊命㗎咋」,現時只回復以往10至20%生意。

對於5月的換氣措施,阿Hong指,政府至今仍不封關才是源頭,不應「搵食肆嚟搞」,「今日有6單(確診),6單都係輸入嘅,你不停為輸入case搞晒成個香港,咁你有咩為啫?」為應對措施,阿Hong或會嘗試加設空氣淨化設備,「你叫我萬幾兩萬蚊請個顧問,太貴喇,百上加斤,睇下同行有咩最慳錢嘅做法做」。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner