隔牆有耳:去石牆花買物資 何秀蘭︰做好入獄準備(李八方)

更新時間 (HKT): 2021.03.29 02:00
何秀蘭

極權對民主派追殺毫不手軟,近排面對8.18維園「流水式集會」案檢控嘅何秀蘭(Cyd),似乎打定輸數,早前有記者喺「石牆花」見到阿Cyd幫自己執拾物資包,為入獄做準備。

「多啲資訊減低恐懼感」

阿Cyd噚日再喺fb出post,話經歷幾次過堂同19日聆訊,8.18案會喺4月1日宣判,仲話「已做好入獄準備。祝願大家平安,在艱難日子守住信、望、愛。」阿Cyd同八方講,案件情況不便透露太多,但相信都唔使作無謂幻想。雖然話做好準備,實情冇人可以完全平靜,所以佢一樣忐忑,但就搵到方法減低不安,就係多做準備,「同當年爭取同志平權一樣,當大家知道多啲資訊,可以減低恐懼感,所以先上咗石牆花買定物資,起碼知上面係咩環境嘛。」佢原來亦聽咗邵家臻唔少講座,仲話就算唔係自己坐監,都想學點支援其他人。

佢同八方講,萬一坐監,預想情況未算太壞,形容「起碼活動空間大過太空人上月球。」不過咁諗似乎阿Q咗啲,係咪真係面對到?阿Cyd坦承,喺試煉面前會見真章,所以唔會牙擦,但至少承認內心有不安同恐懼,先係梳理情緒最有用方法。

李八方

一格照片,一個故事,Follow蘋果Instagram!
BannerBanner