港鐵取巧加價近20% 市民轟數字遊戲呃人:你年年都有錢賺,係咪先?

更新時間 (HKT): 2021.03.29 22:01

港鐵今日(29日)公佈,按照「可加可減」機制,今年可減價1.7%,是12年來首次有得減。不過當計及折扣優惠更改後,港鐵票價「明減實加」近20%;即使獲行會批准減價,但其票價仍增加約17%。有關注組成員批評所謂「5%票價優惠」只屬取巧,「用盡晒機制入面嘅操作,令到好似減好多咁」,且尚有2.85%的累計加幅仍未處理,封頂機制令票價加幅不斷順延。

巿民對於港鐵今次「明減暗加」指有欺騙巿民之嫌:「咁不如唔好減,你減得價,就係想巿民應該受惠,但係如果你話你轉個頭係貴咗,咁加價好似好呃緊人咁。」形容是「數字遊戲」,令整體觀感較佳而已。

乘客:佢睇準你搭開就唔會走㗎啦!

Michael每天都會乘搭港鐵,聽到港鐵按「可加可減機制」,減價1.7%後,反問「可減?佢有加冇減㗎喎,有減㗎咩?」在得悉一番調整後,車票價格更高,以戲謔的語氣稱:「咁多謝呀?計番條數都唔止啦!」

他認為港鐵的行為似是在走灰色地帶,只是「做個樣咋嘛」,又稱港鐵相當擅長捉摸巿民大眾的心理,運用自己是「最穩陣」的交通工具的優點加價:「佢就係睇準你呢個位,覺得你搭開就唔會走㗎啦」,又指「佢所謂嘅有得畀你揀,其實即係冇得揀」。

Michael稱,平日經常過海,故購買港鐵「都會票」,坦言加價對他的影響有限,但他亦贊同,有關調整對基層巿民的衝擊較大,雖然對港鐵沒有太多期望,但指「梗係想減啦,減多啲啦」。

唐小姐不常搭港鐵,她稱港鐵最新票價調整安排「好無聊」,指普通巿民聽到「減價」二字,或會以為車費更便宜,但實際上原來加了價,形容相當無意義,且有欺騙巿民之嫌:「咁不如唔好減,你減得價,就係想巿民應該受惠,但如果轉個頭係貴咗,咁加價好似好呃緊人咁。」

唐小姐稱「本身都麻麻哋佢(港鐵)」,對港鐵毫無期望,但認為港鐵亦明白,在疫情的重創下,經濟受創,若然再公然加價,會令巿民不滿,於是透過這種「數字遊戲」,令整體觀感較佳。

長者盧小姐受惠於長者乘車優惠,不受是次加價影響,但直言對港鐵的加價行為不贊同:「你港鐵年年都有錢賺,係咪先?咁你應該回饋返畀啲巿民啦!」又指:「唔應該囉,尤其係而家個疫情咁樣,咁多人失業,都係要回饋返畀啲巿民,幫助吓囉!」認為政府應推出措施減低加價對巿民的影響:「佢係(港鐵)大股東嚟㗎嘛,梗係要做返啲嘢啦!」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner