寫給47人的家書︱吳敏兒,用最溫柔嘅聲線,講出最堅定嘅訴求!

更新時間 (HKT): 2021.03.30 00:02

47名民主派因參加初選被控違反《國安法》下的串謀顛覆政權罪,至今僅11人,即劉偉聰、呂智恆、楊雪盈、林景楠、黃碧雲、鄭達鴻、彭卓棋、柯耀林、何啟明、施德來及李予信獲准保釋。不見天日的歲月,或許很漫長,《蘋果》邀請牆外的人將思念化為家書,默默向被囚者打氣。

Carol姐姐:

你估到我係邊個嗎?以前幾乎每逢星期三晚7:30都會喺D100同你打招呼,大聲叫你一聲「Carol姐姐」,但看似簡單嘅事,而家都唔易做到了,期待嚟羅湖探你嘅時候再打招呼,我排緊隊㗎!

鍾意學PA妹妹咁樣叫你,係因為覺得好有親切感,你喺政界同工運界都係「特別的存在」,往往會用最溫柔嘅聲線,講出最堅定嘅訴求(心心眼),無論時勢幾壞,嗰日有你同阿廷做主持,都會輕輕鬆鬆又過幾個鐘咁,係聽眾最好嘅陪伴,但偏偏咁和理非,希望用對話嚟解決問題嘅你,而家都被困喺石牆內⋯⋯(當然任何政治犯都不應被囚!)

你曾經講過希望嚟探你嘅人,都同你分享一個笑話,我講件比笑話更好笑嘅事畀你知吖!前幾日成班忠誠廢物去打疫苗,有網媒報道,嗰日郭偉強同鄭泳舜阻住記者影相,記者就大嗌:「郭偉強,行開啦,你透明呀?喂,叫你呀。」記者又叫鄭泳舜唔好阻住,佢應一聲「吓」,記者即刻回一句:「吓你老竇呀,行開啦。」你睇完係咪覺得好爽,笑咗出嚟呢?攝記大哥好波!

而家日子唔易過,我哋惟有苦中作樂啦,石牆內外都要好好過好每一日!

羅拉

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner