李八方online︱「嗰個女仔」都唔識?曾國衞撈亂麥美娟👭梁美芬

更新時間 (HKT): 2021.03.31 14:41
曾國衞將身兼基本委員會委員嘅經民聯梁美芬認錯做工聯會麥美娟。

北京閹完香港選舉制度,特首選委會仲可以由1,200人加到1,500人,真係好神奇。其實加多咗嗰300人,咪又係同一種人。好似政制及內地事務局局長曾國衞咁,佢都將身兼基本委員會委員嘅經民聯梁美芬認錯做工聯會麥美娟啦,根本就不用分得那麼細。

立法會一個小組委員會今日傾人大決定,本身係港區人大嘅廖長江就問,如果有日佢唔做人大,咁喺選委會入面,佢係咪變番以議員身份做選委?答案當然係啦!之後建制派謝偉俊又問,其實1,500人選委會係咪預咗唔齊人,甚至得1,400人左右?曾國衛就話,大原則係盡可能足1,500人,但無可避免有人有多重身份而唔齊1,500人嘅。

梁美芬咪就係多重身份咯,佢仲好關注選委嘅宣誓安排添,一輪咀講好多意見出嚟,搞到曾國衞答到亂晒,無啦啦話多謝「麥美娟」嘅意見,要廖長江出口提醒先識更正。麥美娟又係衰嘅,鬼叫佢第一輪發言時講晒啲時間,可能曾國衞心急要答呢位曾經大鬧過特首嘅嗰個女仔,所以咪亂晒大籠囉!

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner