隔牆有耳:全程無聲出 777當透明 
曾國衞做垃圾桶傳人(李八方)

更新時間 (HKT): 2021.03.31 02:00

「武官」出身嘅曾國衞自從接任政制事務局局長後,多次被批評「唔熟書」,連建制派謝偉俊最近都頂佢唔順,喺立法會公開炮轟佢「累死香港」。

曾國衞身為政制及內地事務局局長,喺政府噚日長達一個半小時有關人大修改香港選舉制度嘅記者會上,竟然全程齋坐一言不發,令人聯想起2014年政府就政改同學聯代表談判時,因全程默不作聲而畀網民惡搞嘅「垃圾桶」前局長劉江華。

低頭抄足個半鐘筆記

雖然政府新聞處一早通知記者,現身記招嘅官員,會先排排企攞住本宣傳小冊子畀記者影相,但曾國衞似乎「發緊夢」,一出場已經同林鄭「貌合神離」,自己走咗去個位放低文件,當見到佢下屬、政制局常秘鄧忍光同林鄭步伐一致排排企後,先知道自己「瀨嘢」,再急急腳歸位影相,表現尷尬。

喺記者會上,林鄭全程只同常秘鄧忍光交流,講解完嚟緊地區直選嘅組成方法後,更擺明當曾國衞透明,主動話:「我睇吓阿Roy(鄧忍光)有無嘢補充」。「文官」出身嘅鄧忍光亦即時醒水,搭到嗲話:「行政長官嘅說明係正確嘅!」又話:「頭先行政長官都講得好詳細嘞!」其後更喺林鄭搵資料期間,主動向林鄭遞「紙仔」補充,十分識做,AO出身莫非寧舍夾?

至於不獲林鄭「點燈」嘅曾國衞,今日就只全程低頭抄筆記,一眾睇佢抄足個半鐘嘅傳媒,都唔知佢有乜嘢好寫。喺記者會結束後,作為曾國衞下屬嘅鄧忍光就好識做,喺林鄭率先離開後,就特別先讓曾國衞先行一步,自己就行喺最尾離開。

李八方

一格照片,一個故事,Follow蘋果Instagram!
BannerBanner