隔牆有耳:阿娥有爺撐 廢噏當秘笈(李八方)

更新時間 (HKT): 2021.03.31 02:00
林鄭月娥

自從有北京加持之後,特首林鄭月娥家陣自信返晒嚟,亦知公開發言唔係講畀香港人聽,而為向北京表忠,所以有恃無恐,即使亂噏當秘笈都唔理,好似噚日上晝回應記者問政府收緊公司查冊安排時,拋出一句「睇唔到記者點解有特權」,然後講閹割香港選舉,就話國際公約無要求一人一票或票值相等,但八方搵吓資料,發現777呢兩句嘢都同事實有出入,今次佢似乎又係亂噏當秘笈。

唔識條文詐唔知

八方先講「睇唔到記者點解有特權」呢句,政府話收緊公司查冊係保障私隱,但偏偏私隱條例入面,就特別寫明新聞活動可獲豁免,仲未計有多條香港法例,入面都有就記者工作特別處理,甚至條文寫明叫「特權」呀。

至於國際公約有冇要求一人一票問題,其實777硬銷政改時已經畀人摑過好多巴,睇番聯合國人權事務委員會早喺1996年發表嘅文件,編號「CCPR/C/21/Rev.1/Add .7」裏面嘅第21段,咪清楚寫咗「... 必須執行一人一票的原則」同「投票人所投下的票應一律平等」,想詐唔知呃香港人,有啲水平好喎!

李八方

一格照片,一個故事,Follow蘋果Instagram!
BannerBanner