隔牆有耳:56年可樂樽「休假」換新裝(李八方)

更新時間 (HKT): 2021.04.01 02:00
■最後一批玻璃樽可樂會喺今年第二季推出。

唔少可樂迷都鍾意收藏可口可樂玻璃樽,但呢個經典汽水樽好快變集體回憶,因為可口可樂宣佈呢個陪伴港人半世紀嘅經典玻璃樽裝可口可樂,喺今年第二季開始「休假」,要到出年先用全新形象出現,新設計引入更多環保元素,包含再生玻璃物料,樽身變得更輕。

最後一批第二季推出

原來可口可樂自1965年起開始生產玻璃樽汽水,至今已陪伴香港人56年,可口可樂方面話,今次停可口可樂玻璃樽裝,係因為裝瓶夥伴香港太古可口可樂今年更新設備,安裝全新玻璃樽裝飲品生產線,所以打算一次過換包裝,今次除咗可口可樂樽,好似雪碧、芬達及玉泉忌廉汽水玻璃樽裝都會係今年第二季開始一齊「休假」。

可口可樂方面話,最後一批可樂玻璃樽汽水將於今年第二季推出,茶餐廳、粉麵舖同士多辦館都買到。可口可樂仲邀請90後風景攝影師袁斯樂(Kelvin Yuen)為可口可樂經典玻璃樽拍低「臨別照片」,當中部份相片取景於士多、茶餐廳等地點,令港人好好緬懷與可口可樂相遇的時光,可樂迷可於可口可樂Journey網站、facebook及instagram睇到啲相。

李八方

一格照片,一個故事,Follow蘋果Instagram!
BannerBanner