李八方online︱藍絲混裝上H&M辦公室交聯署促道歉

更新時間 (HKT): 2021.04.01 16:40
又有藍絲去H&M辦公室踩場,不過今次終於記得收埋啲Nike波鞋。

大陸境內嘅新疆棉風波持續多日後有平息迹象,不過向來擦鞋擦到盡嘅香港保皇黨,點會輕易放棄邀功機會呢?繼日前新民黨潘國山等人因穿Nike鞋上H&M香港辦公室抗議被嘲後,今日又有幾個保皇黨蝦兵蟹將照辦煮碗遞抗議信,聲稱收集到4萬幾個聯署,仲話如果H&M唔正式道歉,唔排除發起杯葛罷買喎。

今日5個聲稱係「要求H&M公關道歉大聯盟」嘅保皇黨去到H&M香港辦公室遞聯署信,要求H&M就拒用新疆棉「傷害中國人民感情」道歉。5個人當中,八方幾乎無邊個認得出,係兩個身穿鮮紅色「中国人不吃這一套」T-Shirt嘅黃煒龍同高松傑稍為有啲印象咁。八方原先以為件衫係大聯盟制服啦,點知其他人就着西裝同中山裝,成隊雜牌軍咁,八方見到都不禁想問霞姨「點做嘢㗎?」好在,佢哋無人着Nike或者Adidas波鞋,而係李寧牌同早前指中國勞工無剝削嘅Skechers,總算挽回些少分數咁啦。

講返聯署。代表「大聯盟」發言嘅黃煒龍話,佢哋喺72小時入面收集到4萬幾個網上聯署,數字「絕對唔低」咁話。佢又話,H&M至今冇道歉,淨係發表含糊聲明,佢哋唔會接受,仲話如果H&M再唔道歉,就會商討罷買啊。

話雖如此,不過黃煒龍又話佢哋咁做唔係想咄咄逼人,只係想盡快平息事件唔好影響香港員工。喂,呢頭話人「傷害國人感情」,嗰頭又話想息事寧人得唔得㗎?陣間小心俾人當做「忠誠的廢物」就唔好喇!

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner