李八方online︱長江4.1左報登倒模廣告撐改選制 詩詞學會「共唱大舉」

更新時間 (HKT): 2021.04.01 12:00

執輸行頭慘過敗家?李嘉誠嘅長江集團未必咁諗喎。當人大常委會喺周二通過修訂《基本法》附件一同二,將香港嘅選舉制度嚟個開倒車式翻天覆地改變,一班人大、政協、愛國組織同政團當然要鼎力支持,喺左報畀錢登廣告以示自己係「愛國者」,希望阿爺「見到」佢哋嘅一片「紅」心壯志。大孖沙都唔例外,梗係要跟隊買廣告效忠,紛紛喺噚日嘅《大公報》同《文匯報》表明一致支持全國人大常委會決定。

之但係,喺噚日刊登嘅地產商紅海廣告中,冇咗超人李嘉誠旗下嘅長和系集團,但呢啲表忠嘢,有心又唔怕遲,你慌遲一日登,左報唔畀咩?結果長江集團嘅廣告,今日4月1日先登場,真係有心,廣告半版在上,下面半版則係黃志祥嘅信和集團,字眼模式全部一樣,總之就係「全力支持」,唔通左報會見到話反對嘅廣告咩……

除咗長江廣告,一個叫做「香港詩詞學會」嘅組織亦喺左報賣廣告支持人大決定,除咗出錢買咗全版廣告,仲好有心思囉,話個決定令大家深受鼓舞,詩情激昂下,附埋43首詩情頌賀一番,比啲大孖沙只出錢買倒模廣告,多咗一份「真愛」。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁