李八方online︱李百全特色的《議事論事》 狄志遠示範小罵大幫忙

更新時間 (HKT): 2021.04.01 22:40
狄志遠話今次「閹制」唔理想、參選門檻高咗、審查意味好強等。

前排無啦啦被廣播處長李百全抽起,盛傳同討論中央「閹制」有關嘅節目《議事論事》,今晚又可以播。八方睇完終於明點解出到街,因為節目主要係由建制派講晒,最唔建制派嘅嘉賓,就係以為自己仲係民主派嘅新思維主持狄志遠,傾力演出咩叫「小罵大幫忙」。

呢集《議事論事》有得傾「閹制」喇,不過探討嘅係「建制派如何重構政治版圖」,受訪議員有經民聯梁美芬、工聯會黃國健、紫荊黨主席李山,另加中大學者馬嶽咁大把,民主黨主席羅健熙只係過吓鏡。

去到前立法會主席曾鈺成主持嘅環節,就輪到狄志遠以「民主派」人士身份表演。狄志遠話今次「閹制」唔理想、參選門檻高咗、審查意味好強等,即係「小罵」。然後曾鈺成問,民主派要攞提名有冇難度時,狄志遠話「人大政協入面都有啲開明人士」,連曾鈺成聽到都忍唔住笑出聲。

「小罵」完梗係「大幫忙」。狄志遠話「中央都話明唔搞清一色,你連畀人去選嘅機會都冇,咁你中央好難交代?」交代?同邊個交代?中央話明「中國人不吃這一套」呀,使乜向人交代?

狄志遠:中央大動作無非想施政有效

狄志遠又話,泛民一係維持激進、放棄議會平台,一係就調整策略,相信「對話總比對抗好」。曾鈺成跟手助攻:「照你嘅講法,並不是立場轉變,只係政策或策略嘅調查?」狄志遠再補刀,話民主派喺議會不嬲都係少數,所以要結合民間力量,並唔係只靠議會嗰十幾個席位。真係極盡氹人落叠嘅意味,彷彿呢廿幾年嚟,民主派從未試過好聲好氣咁「對話」、從未結合過民間力量一樣咁。

狄志遠仲好似好驚民主派唔去選,話如果民主派放棄議會,民主運動會萎縮,仲提到「去到尾,我哋唔係喺議會鬥爭數人頭,中央搞咁大動作佢想點啫?佢想政府施政有效」,「如果議會裏面,中央控制到建制派控制大局,大家咪坐喺度等飯開,咁議會冇質素,政府施政唔能夠配合民意,得不償失喎!」狄志遠自己都話民主派一直係少數,咁呢廿幾年嚟,建制派佔多數嘅議會又幾時真係「發展經濟、改善民生」過呢?政府施政唔配合民意就得不償失?而家政府嘅施政都冇配合民意啦。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner