隔牆有耳:長和系愚人節撐閹選舉(李八方)

更新時間 (HKT): 2021.04.02 02:00
■長江集團同信和集團嘅廣告噚日先至登出,各佔半版。

執輸行頭慘過敗家?超人李嘉誠嘅長江集團未必咁諗喎。當人大常委會喺周二通過修訂《基本法》附件一同二,將香港選舉制度嚟個開倒車,一班人大、政協、愛國組織同政團當然要鼎力支持,前日喺左報畀錢登廣告以示自己係「愛國者」,希望阿爺見到佢哋嘅一片「紅」心壯志。大孖沙都唔例外,梗係要跟隊買廣告效忠,紛紛喺前日嘅《大公報》同《文匯報》表明一致支持全國人大常委會決定。

之但係,喺前日刊登嘅地產商紅海廣告中,冇咗超人李嘉誠旗下嘅長和系集團,但正如八方噚日講,呢啲表忠嘢有心又唔怕遲,你慌遲一日登,左報唔畀咩?結果長江集團嘅廣告,係噚日4月1日愚人節先登場,真係有心,廣告半版在上,下面半版則係黃志祥嘅信和集團,字眼模式全部一樣,總之就係「全力支持」喇!

詩詞學會吟出真愛

除咗長江廣告,一個叫做「香港詩詞學會」嘅組織亦喺左報賣廣告支持人大決定,除咗出錢買咗全版廣告,仲好有心思囉,話個決定令大家深受鼓舞,詩情激昂下,附埋43首詩情頌賀一番,畀啲大孖沙只出情買倒模廣告,多咗一份「真愛」。

李八方

一格照片,一個故事,Follow蘋果Instagram!
BannerBanner