李八方online︱史墨客復活節出po畀大家搵彩蛋?

更新時間 (HKT): 2021.04.03 11:37
美國駐港總領事史墨客(Hanscom Smith)喺Facebook出post,講佢落街食咗碗沙牛麵,但表面睇落去平平無奇嘅post,似乎暗藏彩蛋。

聽日就係復活節,大家又會唔會玩吓搵彩蛋遊戲呢?美國駐港總領事史墨客(Hanscom Smith)今日就喺Facebook出咗個post,講佢落街食咗碗沙牛麵,但表面睇落去平平無奇嘅post,似乎暗藏彩蛋。

史墨客喺個post度係咁寫:「週末嘅時候,我好中意周圍去嘗試唔同類型嘅食物。最近我就去咗堅離地城試吓啲茶餐廳食物!- 總領事史墨客」然後有一張似係喺茶記影,有沙嗲牛肉麵、西多、凍檸茶,同埋一杯唔肯定係凍啡定凍奶茶嘅飲品。

大家睇完個post覺唔覺有咩特別?以往史墨客嘅post極少寫錯字,但今次佢將堅尼地城寫為「堅離地城」,有眼利網民都留言表示發現到。不過話咁快,佢已經將「堅離地城」改番做堅尼地城,真係一啲都唔離地。

有西環街坊同八方講,其實史墨客幫襯嘅呢間茶記一啲都唔小嘢。一來佢哋嘅沙牛麵出晒名,二來間茶記係位於士美非路熟食中心入面,平時好多港大學生去食,如果唔係識路之人,根本唔會識得去,又一次顯示史墨客幾唔離地。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner