防疫措施︱酒吧K場雀館業界輪流絕食抗議復業無期

更新時間 (HKT): 2021.04.04 22:28

酒吧、麻雀館等已被勒令停業近4個月,雖然業界多番主動配合政府防疫措施,惟至今仍是復業無期,逾萬個家庭的生計大受影響。酒吧、卡拉OK及麻雀館等業界代表今午起以絕食明志,促特首正面對話,並回應業界的苦況。

香港持牌酒吧會所聯會、娛樂及飲食協會、卡拉OK Box、卡拉OK同業協會及麻雀界代表今午3時起,一連4日3夜接力絕食,並於復活節假期結束後,在周三(7日)向立法會議員及政府遞交請願信,促政府賠償被勒令停業的處所,並交代停業準則。絕食行動會分時段進行,每節2至4人參與,並持續6至12小時。

單親媽媽:怕消費唔敢帶小朋友出街

在酒吧當侍應4年的30歲單親媽媽Wing,要獨力照顧4名2歲至8歲的子女及半失明的母親。酒吧停業後,她無了期放無薪假,全家頓失收入來源,除了無法在假日消費一下,子女的興趣班亦要取消:「到依家好似做節日咁樣啦,我係根本唔敢帶佢哋出街,因為帶佢哋出街要消費、要錢,我好怕佢哋到時好羨慕人哋嘅小朋友⋯⋯我驚佢哋唔開心,而唔夠膽講所有嘅嘢,怕佢哋會失望。」

疫苗她照樣接種,復業卻遙遙無期,又不合乎申請資助的資格,走到窮途末路,還要一個人獨力去承擔所有的壓力,絕非易事。Wing心中卻對母親和子女仍有無盡愧疚:「每一個做媽媽嘅,都好想畀最好嘅嘢小朋友,但我覺得我好失敗,因為我畀唔到最好嘅嘢佢哋,亦都好內疚,點解可以咁大個人都照顧唔到自己媽媽,供養唔到佢。」

酒吧業感絕望

阿Wing的苦況,僅僅是過萬個受影響的業界家庭的冰山一角。記者會以「昔日嚴峻,共渡時艱;今日政府,過橋抽板;要求回應,要求賠償」為題,對政府漠不關心作出最沉重的指控。過去提出無毒空間、承諾約章,甚至乎主動呼籲同業接種疫苗,主動配合及建議防疫措施,持牌酒吧會所聯會創會會長梁立仁稱「我夠膽講,係咁多個曾經被勒令停業嘅處所裏面,酒吧、卡拉OK、麻雀館,我哋做嘅嘢,應該無人多過我哋」。

酒吧業界早於約半個月前的記者會上,已為政府設下對話「死線」,稱若復業、交代停業標準、為停業期的損失作賠償等訴求不獲回應,將會將行動再進一步升級。百般主動配合,換來是政府的無動於衷,走到絕食一步,業界只有一個卑微的願望,希望政府關注他們的苦況:「去到絕食依一步,淨係希望政府聽到我哋嘅聲音。」談及政府對絕食行動的反應,梁未見太樂觀,但重申從業員以絕食發聲,如果亦未能喚醒政府對業界苦況的關注,他亦無能為力,不知道還可以如何將行動升級。

酒吧業整年得24天無限制營業

梁指,疫情下已有約300間酒吧結業,佔全港持牌酒吧約四分之一,錯過業界的旺季,若政府不賠償,估計再有300間酒吧結業。梁憶述,去年4月3日是全港酒吧業被勒令停業的首天,整整一年過去,只有24天可在無任何限制下營業,麻雀館亦被停業212天:「2020年,我哋因應疫情,政府處理得唔好,未有疫苗,我哋冇咗復活節,冇咗聖誕節呢兩個我哋行業入面最重要嘅節日。今年,係2021年,疫情漸趨穩定,疫苗亦都(有)巿民開始接種,我哋業界亦都努力推動,但係今時今日我哋企喺呢度,4月4號,我哋呢個復活節同樣地停業,我哋好擔心,擔心到唔知2021年嘅聖誕節,我哋呢幾個行業仲存唔存在!」

他呼籲市民來到政總外支持他們的絕食活動,並希望巿民可簽名聯署。業界舉行記者會期間,有一名警員到場,以揚聲器播放違反限聚令的廣播。

食物及衞生局回覆《蘋果》查詢時指,會按疫情發展及疫苗接種計劃進度調整社交距離措施,重申會與酒吧業界保持溝通,聽取其意見及建議,並提供更多防疫措施的詳情。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner