閹割選舉︱馬逢國稱港為「異化民主」 林兆彬:歪理講一千次都唔會變真理

更新時間 (HKT): 2021.04.04 15:33
港區人大代表兼立法會議員馬逢國於《城市論壇》上,繼續為北京閹割香港選舉制度護航。

中央出手閹割香港選舉制度,港區人大代表、立法會議員馬逢國在港台節目《城市論壇》稱,香港「亂到離晒譜」,中央不能視而不見,他稱中央的目的非常簡單,只是真正落實「一國兩制、高度自治」 。民主黨前主席劉慧卿則批評,是次改制令香港選舉喪失尊嚴。

劉慧卿斥北京零諮詢

馬逢國稱,香港已實踐西方式民主一段時間,「但有好多奇怪嘢走出嚟,係異化咗嘅民主」,又稱參選人沒有理由對自己國家、城市對忠誠存在問題,但香港正正出現這種現象。馬逢國形容香港「亂到離晒譜」,又指亂象是出於所謂的民意代表身上,故中央不能視而不見,而且有責任向全國人民交代。馬又稱「一人一票係咪就係良政善治呢?大家可以辯論」。劉慧卿聞言反駁:「我哋想辯論啊,但中央冇畀機會我哋辯論」,批評整個方案未有經過諮詢。

新民黨前區議員甘文鋒表示,市民應要看到政改的前因後果,稱「管治差咗就要解決」。他又認為制度不會停滯不前,他稱雖然現時立法會選舉落實用「432」方案,其中地區直選議席被削至20席,但將來中央有可能再增加直選議席,「唔係去到2047年都係咁,我哋都希望未來可以產生更多直選議席」。

林兆彬:委任制一定係退步

改制後,立法會選舉參選人須在選委會五大界別各取至少2個提名,劉慧卿批評這令選舉變得毫無尊嚴,「今次係要拜票,都唔知點先攞到提名,又唔知點先證實自己係愛國者,一個好賢能嘅香港人會唔會有興趣參加咁嘅遊戲?」油尖旺區議員林兆彬亦表示,以往參選人是尋求街坊等服務對象的提名,他對要取得選委會界別提名感到奇怪,「我冇服務過佢哋,人哋做咩要提名我?」

作為曾經由選委會產生的議員,馬逢國稱,「以前選委會800人,我都拜訪過700人,最長嘅電話傾咗4個鐘,係有得做!點會做唔到?」馬續稱,「如果(參選人)嚟搵我,我都覺得有得傾,唔會因為政治立場拒諸門外」。

改制的另一個爭議是選委會將踢走區議員,同時引入由政府委任的滅罪委員會、防火委員會代表。曾任油尖旺區防火委員會委員的林兆彬稱,滅罪、犯火委員會代表的代表性遠低於民選區議員, 他指委員會代表不是經選舉產生,市民不會知道他們的政綱,「冇人民授權,完全理解唔到」,又稱「委任一定係退步,歪理講一千次都唔會變真理」 。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner