隔牆有耳:優惠碼「REGINALEGS」震撼巴打 
VPN公司搞葉劉美腿大酬賓(李八方)

更新時間 (HKT): 2021.04.05 02:00
■網民發現NordVPN限時推廣碼用上「REGINALEGS」字眼。

曾經因為港版國安法出現而令下載量爆升嘅著名VPN服務商NordVPN,呢個復活節假期,竟然出咗個震驚700萬人嘅限時推廣碼,有連登網民報料,話只要輸入「REGINALEGS」,用戶就可以額外免費用多一個月。如果細心睇個優惠碼,會留意到內有乾坤,其實可以拆開REGINA同LEGS兩組字。咁佢哋究竟乜關係?大家不妨自己搵谷歌大神查證。

接受BBC訪問被寸係零

其實八方一度以為係網上假資訊,但有連登巴打就實測過,發現真有其事,但更多網民係喺相關帖文留言區,瘋狂用「姐姐」葉劉淑儀嘅「美腿」照留言洗版,令到大家驚覺,原來VPN公司嘅公關人員,原來係咁重口味。除咗「美腿」照,網民仲提議下次推廣碼用「REGINAZERO」,事關葉劉仲多咗個新外號叫「Zero Ip」。

事緣佢接受BBC《HARDtalk》節目訪問,連登網民形容戰況係葉劉「被主持寸到一棟都無」,最精采嘅交鋒位係主持人好直接問葉劉嘅政黨喺區選拎到幾多席,然後話:「零席,零席,葉女士(ZERO, ZERO, Ms Ip),八方隔住螢幕都聽到打臉嘅巴掌聲,亦因為咁,「Zero Ip」亦不脛而走。不過,葉劉唔認輸呀,佢之後喺fb出帖話自己「以直報怨、堅持己見」,當發現主持人對香港存在嚴重偏見,指摘又唔基於事實,佢亦於是一直努力反駁對方謬誤。但真係有咩?不過咁,比起之前拂袖而去,今次佢最多黑面仲捱到完場,或者應該頒個進步獎畀佢嘅!

李八方

一格照片,一個故事,Follow蘋果Instagram!
BannerBanner