隔牆有耳:唔畀祝羈留者快樂 港台換節目嘉賓(李八方)

更新時間 (HKT): 2021.04.05 02:00
陳建強

換咗台長後一直被抽調節目嘅香港電台,最近連逢周日播出嘅英文節目《給香港的信》都被波及,噚日嘅嘉賓原本係屯門區議員巫堃泰,但上個星期突然換人,由港台顧問委員會前主席、「梁粉」陳建強上陣。

結果播出嘅節目中,陳建強唱好北京改動選舉制度,認為可以保障國家主權同香港長遠繁榮穩定,又呼籲香港年輕專業人士把握內地發展機遇,至少肯定有廣播處長李百全會讚好。

梁粉上陣 狂擦內地鞋

其實港台未有交代點解突然要換嘉賓,但巫堃泰早前就喺facebook透露,指佢本來想喺呢一集內容,向一位因公務經常探訪嘅羈留人士講句「復活節快樂」,但錄音後嘅第二日就有編輯同佢講,按照港台嘅新編採標準,佢呢封「給香港的信」被視為有爭議,要通過檢定先可播放。巫堃泰話對此冇乜太大感覺,會尊重編輯自主,而佢之後亦將呢封寄唔出嘅「給香港的信」內容,貼喺佢facebook到,即使港台唔用都有機會畀市民睇到。

李八方

一格照片,一個故事,Follow蘋果Instagram!
BannerBanner