李八方online︱ 「波點女王」草間彌生展覽周三揭幕 11件早期絕作搶先全球曝光

更新時間 (HKT): 2021.04.06 17:37

趁住疫情放緩,八方即刻幫一眾文青八到有好去處!風靡全球嘅日本藝術家「波點女王」草間彌生11件從未曝光嘅早期絕作,聽日起將會搶先全球,率先喺香港揭幕展出,包括3幅油畫精品同埋8幅紙上作品。今次展品嘅特色,係全部都係女王早期嘅作品,可以從中睇得出「波爾卡圓點」、「無限網」等等嘅元素,仲係草間彌生送畀佢畢生摯友廣瀨輝夫醫生嘅禮物。

11件作品入面,焦點作品包括草間彌生嘅兩幅「河川」絕作,包括《密西西比河》(Mississippi River)同埋《哈德遜河》(Hudson River)。兩幅絕作係女王1960年嘅作品,畫入面已經可以睇得出草間彌生「無限網」畫風嘅雛形,奠定女王日後別樹一幟嘅風格。當時嘅藝術家大部份都用白色做主調,草間彌生偏偏以赤紅色調入畫,非常搶眼,每幅畫估價去到300萬至500萬美元㗎!

八方知道,有啲草間粉絲特別鍾情裝置藝術《無限鏡屋》呢類色彩繽紛嘅風格,今次展覽都有類似嘅作品睇。其中一幅油畫作品《無題》(Untitled),正正係草間彌生最早融入多種鮮艷繽紛色彩嘅範例,估價亦去到250萬至350萬美元,相當珍貴。

另外8幅紙上作品,全部屬於草間彌生1957年去美國之前嘅作品,當中已經見到唔少「草間style」,包括波爾卡圓點、花卉等等。留意返,當時嘅草間彌生只係20歲左右,但已經尋找到自己獨有嘅畫風。

八方仲知道,呢8件作品,仲有一重特別意義。今次嘅所有作品都屬於「草間彌生:已故廣瀨輝夫醫生珍藏」,到底呢位神秘醫生係邊位呢?事緣喺1960年代,未成名嘅草間彌生為追藝術夢移居紐約。當時成個曼哈頓區得兩位日語醫生,其中一位正正係廣瀨輝夫,更加經常為日籍病人提供平價嘅醫療服務,仲會幫藝術家免費睇症。由於當時草間彌生初到美國,身無分文,機緣巧合就搵咗廣瀨醫生治病,兩人自此變成畢生摯友。今次嘅8件紙上作品,有7件都係由草間彌生親身由日本帶去美國,作為報答廣瀨醫生嘅禮物,表示感激之情。

展覽由聽日起至今個月22日,喺香港邦瀚斯拍賣中心開始有得睇。展覽完咗之後,全數展品就會送去紐約邦瀚斯做展,5月12日會喺當地舉行拍賣會。機會難得,一眾「波點迷」,上呀!

「草間彌生:已故廣瀨輝夫醫生珍藏」專場拍賣

香港預展:4月7日至22日

香港預展地點:香港邦瀚斯拍賣中心(金鐘太古廣場一座20樓)

紐約預展:4月30日至5月12日

紐約拍賣:5月12日

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner