艇家救跳橋男「好過食三年齋」

更新時間 (HKT): 2021.04.06 02:00

【本報訊】一名青年昨由鴨脷洲大橋躍下墮入14米下海面,載浮載沉,附近艇家見狀,隨即拋下救生衣及繩索,舢舨工人將他救起,消防其後將事主送回岸邊,再送院治理。有份救人的女艇家笑言,「救返一個人,好過食三年齋!」

昨上午11時許,姓余青年(22歲)由鴨脷洲大橋縱身躍下海中,人稱「大嫂」的70多歲姓馬女艇家見狀,隨即將救生衣及繩擲到海中救人,「我女人仔唔夠力拉佢上嚟」,幸得其他舢舨工人加入協助,將余救到艇上。

「大嫂」駕駛舢舨40多年,憶述救人經過時仍難掩激動。她指當時正駕船,突然聽到砰一聲巨響,「有嚿嘢跌咗落嚟,見到佢爬爬吓,人嚟㗎,好驚,發晒狂咁」。她急欲救人,惟分身不暇,「我當時顧住盤軚,又唔顧得前面。」

青年獲救後仍清醒

她續稱,青年被救上舢舨後仍清醒,「我叫佢拉住啲嘢,佢識聽,但冇答,後嚟救佢上嚟,問佢嘢佢識講。」約兩至三年前,她亦曾目睹有人跳橋,「又係一個男人,喺度跳落去,好彩唔死得,又有人救返佢。」她笑言:「救返一個人,好過食三年齋!」

警方表示,墮海姓余男子由附近船隻船員救起,救護員接報到場,事主清醒被送往瑪麗醫院治理。警方在現場沒有撿獲遺書,正調查墮海原因,將案件列作企圖自殺調查。

一格照片,一個故事,Follow蘋果Instagram!
BannerBanner