隔牆有耳:田總查MeToo事件冇下文 
紀嘉文甩身 再開跑步班(李八方)

更新時間 (HKT): 2021.04.06 02:00

手機用戶請按此放大圖表

武肺疫情尚未到期,香港人都想保持身體健康,唔少人仲努力做運動,除咗行山仲去跑步,甚至上堂學跑,但唔知大家仲記唔記得,上年11月時,長跑界就爆出咗單MeToo事件,三項香港長跑紀錄保持者紀嘉文被指控捲入性騷擾醜聞,當事人紀嘉文事後喺社交網站專頁認錯道歉,但就只係形容事件係自己「以往冇認真處理感情問題」,香港業餘田徑總會都有開腔,呼籲受害人向田總作出投訴,佢哋會啟動處理投訴機制,但原來田總搞完一輪後,紀嘉文已甩身並復出。

「當面對質」嚇窒受害人

有跑界老友就同八方報料,話見到紀嘉文個「跑手堂」,之前一度以疫情防控為由暫停嘅訓練班,近期已經恢復招生,紀嘉文仲有份落場以「教練」之名教班,仲一星期教足四堂。八方當然即刻問吓田總,係咪已經處理好啲投訴同調查呢?田總就話,真係有收到相關投訴,但同對方講解完後,對方表示暫時擱置投訴。而八方就聽聞係因為投訴人被要求當面對質,咁好難唔令人打退堂鼓囉。田總仲話截至上月底,「跑手堂」體育會唔係該會會員屬會,紀生亦唔係2021年度註冊教練。即係唔關佢哋事。

跑界老友就話,現實係喺香港教人跑步,其實唔需要拎教練牌,只要有人肯跟學,就可以自己開班,所以就特別提醒想學跑步嘅跑友,要小心揀訓練班同揀教練,仲要記得時刻警覺保護好自己。

李八方

一格照片,一個故事,Follow蘋果Instagram!
BannerBanner