武漢肺炎︱屯門2公屋3染疫 街坊斥有住客常亂棄或拒戴口罩

更新時間 (HKT): 2021.04.07 22:02
今日再現2宗不明源頭確診個案,其中一人居於屯門友愛邨愛暉樓第3座。本報記者攝

屯門連續揭發3宗不明源頭確診或初步確診,專家不排除區內有隱形播毒。其中2名患者住友愛邨愛暉樓3座。記者傍晚抵達時,有房屋署職員正搭建藍色帳篷,疑準備為居民強制檢測。有住戶表示不擔心,指大廈環境衞生良好,但指有部份住戶欠公德心,常亂拋口罩,故只能「自保」注意個人衞生,減少外出等。另一名患者住在山景邨景富樓高座。有街坊表示大廈環境衞生惡劣,常亂拋口罩,也有居民出外不戴口罩。

房屋署未明言會否封區

當區區議員林健翔表示,愛暉樓第3座曾經強制檢測,街坊對有關程序不感陌生,但擔心大廈渠管會播毒,或因確診患者曾到訪而傳播,「相信唔係友愛邨(居民),附近居民都去過嗰啲地方」,故令鄰近的街坊較為感徬徨,也有部份居民擔心政府會封區。林指,已向房署查詢會否封區,但房署僅稱暫時只是強制檢測,「但最後都唔肯定會唔會封區,都要睇政府刊憲」。

確診患者曾到訪愛定商場及街市,林健翔稱街市自從轉手至「民坊」後,其衞生環境未有改善,「量體溫個啲都形同虛設,平時清潔……佢(民坊)又應承我做每晚清潔,但係都見到有污糟,出面啲渠有垃圾都要我哋提醒。」

他續指,街市卸貨區一半淪為垃圾區,滿佈紙皮等,環境一直未有改善。被問及會否擔心屯門會成疫區,林稱不擔心,因暫時只有2宗確診,相信居民會做好個人衞生,「始終唔知啲肺炎係邊度嚟,惟有樣樣都做好啲」。

60歲婦暫減外出 嘆倘封區不便

居住友愛邨逾30年的60歲郭婆婆表示,不清楚大廈有確診個案,但認為大廈的衞生環境良好,有時常清潔大廈公共設施,而居所內亦未有傳出異味。被問及會否擔心染疫,郭稱「冇得擔心,佢(病毒)要嚟就要嚟,幾乾淨都要嚟」。但認同強制檢測有助找出感染個案。

她稱,自己較少到商場食肆用膳,但曾前往購物,「(街市)都有人掃,探熱都有職員提醒嘅,但有啲人唔理直入囉」。自己暫時亦會減少外出,「可能兩日先出囉」,也不擔心政府會封區,但認為封區會對生活造成不便,「本身唔鍾意困喺屋企,鍾意周圍去㗎」。

住戶拒減外出 「唔出街會死 會抑鬱㗎」

另一名住戶袁太表示,不擔心愛暉樓爆疫需要強制檢測,但自己對疫情亦感緊張,出入均需要使用紙巾,以避免接觸公共設施。她指,近日適逢復活節出外,未有在附近商場流連,「同啲孫出去唞吓、野吓餐咁」,但平日亦會到附近街市買食材,「而家就準備去(買餸)啦」。

她指,街市及大廈環境良好,但有住戶卻隨處亂拋口罩,「個垃圾桶喺側邊,都可以掉落地下,有時睇唔過眼,攞起垃圾鏟幫佢執返放入垃圾桶。」她斥部份住戶欠公德心,「大家安全健康係財富嚟」。

袁又認同政府為大廈檢測,「如果有事,大家早啲醫咪好」。她亦認同封區,指家中有備存糧食。被問及會否減少外出,她笑言:「點會呀,唔出街會死,會抑鬱㗎!」亦會減少在友愛邨的酒樓飲茶,反而選擇到較遠的酒樓飲茶。袁稱,自己未曾自行檢疫,暫時仍未有接種疫苗的打算。

老翁攜孫落樓:有邊個區冇病毒呀

攜兩歲孫仔落樓的林先生同樣表示不擔心,「(病毒)周圍都有啦,有邊個區冇呀」,會如常攜孫仔落街散步,但只會去人流不多的地方。被問及防疫措施,他指回家後會立即清潔雙手,但難以避免外出用膳,「衞生情況周圍都好好㗎啦,餐廳都好自律,而家疫情都冇計」。

他盼望疫情能盡快消失,不要再擴散。至於有街坊稱大廈環境衞生惡劣,「可能誇張咗啫……口罩周圍都有得買啦」。續稱單位廁所沒有異味,相信情況並不嚴重,但仍不希望會愛暉樓會被封區。

景富樓衞生惡劣 區議員批法團少洗公共設施

另一名確診患者居住在屯門山景邨景富樓高座。有街坊表示大廈環境衞生惡劣,經常隨處見到已棄用的口罩,也有居民出外不戴口罩。

當區區議員的屯門區議會副主席黃丹晴表示,有街坊不明白封區與強檢的分別,以為需要封區檢疫,故需與市民解釋。他亦已諮詢民政處,已得悉周四才會開始強檢;而街坊亦一如以往希望獲知確診者居住在哪一層,亦擔心景富樓的衞生環境,「因為法團處理呢度之後,相對衞生情況唔係太理想」。他批評,除了洗地外,法團亦鮮有會清潔大廈公共設施,需要待居民投訴後才獲安排改善。

有居住中層的街坊李太稱,大廈衞生惡劣,「啲垃圾抌晒喺地下,坑渠嘅鐵板封住咗,洗地水去唔到,啲污水湧晒出嚟」。投訴無門的她,平日只能關門應對,「明明有垃圾桶,點解唔抌入去?」她續指,該層大部份單位已被賣出,故令房署減少對該層的清潔,也有部份街坊不肯戴口罩,疫情持續下都會減少外出。李太稱,自己未曾檢疫過,故不知道相關程序,亦擔心政府會封區,「啲學生返唔到學又麻煩㗎啦」。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner