隔牆有耳:支聯會推「毋忘六四」線上跑 集齊四打卡點(李八方)

更新時間 (HKT): 2021.04.07 02:00
■支聯會今年開放線上跑,市民可於指定日子去到四個地點「打卡」 就算完成。

極權對異見聲音零容忍,打壓港人自由權利,令悼念六四追究當年屠城責任嘅空間越來越細,但港人點會甘心放棄?仍然有人有組織堅持「毋忘六四」,仲喺疫情下諗出方法變招。

下月1至23日「自己跑」

支聯會每年5月都舉行「毋忘六四」實體長跑,今年就會喺5.16早上分批出發,但講明家陣日子越來越壞,挑戰也越來越大,恐怕會有變數,所以今年同時開放埋線上跑畀市民報名,費用同樣係100蚊,已經包咗一件快乾料紀念跑Tee,到時只要喺下個月1至23號期間自己跑,但就要去到四個主要地點「打卡」 再寄番資料畀支聯會確認就算成功參加,完成到仲會有民主女神像做活動紀念品。

四個地點包括歷年舉行燭光悼念集會嘅維園、舉行過「民主歌聲獻中華」嘅快活谷馬場、89年兩次百萬人遊行集合起點遮打道行人專區、港大黃克競樓平台「國殤之柱」,大家可以一次過或分段完成。

根據大會提供路線數據,跑晒全程約11公里,想一次過挑戰難度唔算太高。支聯會提醒,疫情下有啲地點未必開放,咁只要跑經附近已經可以,大家靈活處理就OK。

李八方

一格照片,一個故事,Follow蘋果Instagram!
BannerBanner