隔牆有耳:指懲教善待同志 
岑子杰:監房鎖不住價值(李八方)

更新時間 (HKT): 2021.04.08 02:00

邵家臻創立倡議囚權嘅社企「石牆花」,噚日分享咗同社民連吳文遠探望社民連岑子杰(Jimmy)嘅點滴,形容Jimmy神彩飛揚,每日會同囚友一齊踢踺當運動,傾偈就係處理彼此多年分歧,例如傾吓咩係本土同和理非,又或者點睇未來選舉。

張可森籲「聽多啲廣東歌」

邵透露Jimmy話覺得自己比其他社民連成員更適合坐監,因為佢心態調整到,佢提得最多嘅係價值,「監房鎖得住身體,但鎖不住價值」,邵家臻話咁強調「價值」,正係政治犯、良心犯與別不同嘅地方,亦因為「價值」所以更加敢言、執着、不平則鳴,就算係監房定其他地方都一樣。

Jimmy仲有講吓監獄生活,又讚懲教因為佢係非異性戀者身份,安排佢長住單人房,令佢覺得過往同志運動嘅努力冇白費,至少令懲教署變得對同志友善。

噚日仲有好多人探監,一向寡言嘅郭家麒太太離開時未有發言,但就罕有地舉起「V」字手勢;屯門區議員潘智鍵就去赤柱探張可森,形容對方好精神,仲引述張話「想大家聽多啲廣東歌,因為『有廣東話就有香港』」,仲話佢喺囚室入面亦會哼廣東歌。

講返「石牆花」同邵家臻,佢上年出版咗本《坐監記》,嚟緊將會有一本增訂版《石牆生花—坐監記及其他》,入面會新增更多有關監房文化嘅詳細描述同獄政改革建議,𠵱家開放預購,預計5月出版。

李八方

一格照片,一個故事,Follow蘋果Instagram!
BannerBanner