隔牆有耳:民主思路想自薦做官博上位(李八方)

更新時間 (HKT): 2021.04.09 02:00
■湯家驊(中)開YouTube頻道,首集會請田北俊做嘉賓打頭炮。

北京「完善」香港選舉制度後,特首林鄭月娥噚日又話如有需要會研究增加政治任命官員人數,原本喺香港政圈冇乜生存空間嘅中間派近來又再活躍,可能諗住民主派死得七七八八,佢哋可以成功再上位,好似行會成員、民主思路召集人湯家驊話,民主思路有唔少成員想加入政府管治班子,似乎覺得上位機會到。

湯家驊變YouTuber

2015年成立嘅民主思路,由成立至今已經有學者陳祖為、袁彌昌、張楚勇、宋恩榮等人退出,派人參選亦全部輸晒,但今時唔同往日,主流泛民大黨被打殘,建制派已成「忠誠廢物」,湯家驊噚日同傳媒茶敍,話民主思路仲有20幾位成員,佢早前問過成員想唔想為政府出力,結果反應非常踴躍,成員對加入政府管治班子好有興趣。

湯家驊噚日亦喺茶敍宣傳佢嘅YouTube頻道「竹石台」,個台係咪為選舉造勢?佢話唔關事,又話唔會特別迴避選舉,但又絕對唔係想推佢哋嘅成員參選。其實立會地區直選縮到20席,選唔選都罷,但湯大狀想推薦人入管治班子,唔知同樣想爭呢啲位嘅左派人士肯唔肯讓位畀佢呢?

李八方

一格照片,一個故事,Follow蘋果Instagram!
BannerBanner