隔牆有耳:陳帆睇外國勢力 楊潤雄閱文匯表忠(李八方)

更新時間 (HKT): 2021.04.09 02:00

手機用戶請按此放大圖表

特首林鄭月娥噚日喺立法會出席答問大會,話題離唔開閹割選舉、愛國者治港、外媒「抹黑」等,負責嚟陪坐嘅司局長梗係嫌悶啦!結果林鄭有林鄭台上講,台下有官員打發時間防止悶到瞓着,仲有官員用佢哋枱頭電視或電話睇其他嘢,完全當台上嘅林鄭冇到。

如果問邊個最離譜,運輸及房屋局局長陳帆肯定第一個。陳帆喺會議期間疑似一路用枱頭部電視機睇新聞,仲要政治不正確,睇新鮮出爐南韓首爾市長補選結果,電視機畫面可見在野黨候選人吳世勳勝出一幕。台上面林鄭講「完善」選舉制就唔理,竟然走去睇只會令香港水土不服嘅外國民主選舉,而且香港未來嘅選舉制度已經被北京「完善」咗,外國嘅民主選舉方式唔再為特區所用,唔知陳帆睇嚟做乜呢?

至於教育局局長楊潤雄就唔同喇,雖然佢都冇專心聽林鄭講嘢,但係佢對北京夠忠心喎!《立場新聞》影到佢喺會上低頭用電話睇《文匯報》評論文章,題目名為《新形勢下如何實踐愛國教育》。楊局長政治正確,專心閱讀官媒話語,唔聽林鄭絕對係「情有可原」,抵讚!

許正宇除罩恐播毒

咁其他聽到悶嘅官又點呢?前排被人見到去醫院覆診嘅保安局長李家超睇嚟唔太精神,八方見到佢除咗眼鏡抹抹雙眼醒吓神,萬一唔小心瞌着又被人影到就唔好喇!財經事務及庫務局局長許正宇喺會上就竟然除罩唞氣,完全置自己與他人健康於不顧,如果佢有武肺點算先?不過,高官向來做乜嘢都係合法合情合理,即使除罩播毒又點會有問題呢?

李八方

一格照片,一個故事,Follow蘋果Instagram!
BannerBanner