撐阿布泰︱旺角店畀錢長龍繞商場4圈 市民「一籃子」貨彌敦道排到山東街

更新時間 (HKT): 2021.04.10 19:43

「黃店」阿布泰國生活百貨(阿布泰)的創辦人林景楠早前因參加初選而被控「串謀顛覆國家罪」,海關周四更高調執法,稱該店未有按《消費品安全條例》貼上足夠標籤,檢取市值近百萬貨品,並拘捕負責人。網民質疑海關打壓黃店,發起「爆買阿布泰」的行動。鰂魚涌康怡廣場及旺角荷李活商業中心地舖的分店外,均出現人龍。其中旺角分店的人龍繞了商場地下4個圈,龍尾延至商場外的彌敦道的行人路,直至山東街交界,不少市民「爆買」,「一籃子」貨在行人路排隊,體現港人公民意識。

阿布泰@旺角荷李活商業中心地舖

昨日阿布泰各分店外出現長龍,巿民爭相以港幣「懲罰」。阿布泰位於旺角荷李活商業中心地舖的分店,昨晚於11時營業時間結束後,仍然有顧客輪候付款。今日分店外繼續「打蛇餅」,排隊付款的人龍先在商場地下位置自繞4個圈,龍尾延至商場外的彌敦道的行人路,直至山東街交界。

旺角分店的店員指,今早9時開店前已有顧客在門外守候,9時多起出現排隊人潮,直至傍晚都未有間斷。她表示,由於收銀櫃枱所限,預計今晚需提早於9時起截龍,即9時後便不接受顧客排隊付款,希望在2小時內為所有顧客完成付款手續。

阿布泰@康怡廣場分店

而周六阿布泰康怡廣場分店的人流仍很多,下午2時仍有逾半百人龍排隊,可見巿民熱情未減。胡氏一家排隊近1小時10分鐘才能付錢,無奈指:「無嘢做到呀,淨係可以做呢啲」,因而排隊逾1小時亦要支持。胡先生不擔心市民「爆買阿布泰」僅為曇花一現,反而較擔憂阿布泰舖位不獲續約:「呢度恒隆㗎嘛,可能啲鋪就危險啲啦,支持得幾多得幾多,無嘢做到喇。」

大批巿民排隊「懲罰」阿布泰,胡小姐直言:「見到有個客,買支豉油,都忍幾耐,忍半個鐘,都排隊上嚟買⋯⋯都好感動㗎,其實排得好辛苦㗎下面,又要上落樓梯又要盛,同埋好彩今日天氣唔係好熱,如果唔係下面真係好焗㗎,都好感動!」胡先生亦指,看到長長的人龍,發現仍有很多香港人在默默堅持,「發覺仲有好多好好嘅香港人,仲有好多香港人,唉都唔知點講,又無本事走,惟有係咁啦。」

「香港人一齊排隊買嘢支持 好應分囉」

不願上鏡的何小姐指,在人龍隊伍較後,排隊約20分鐘仍堅持:「頭先聽到啲人話,排2、3個鐘都照排,咁我覺得人哋都做到,我都做到啦!大家香港人一齊排隊買嘢支持,好應分囉 !」又稱其實能做到的相當有限,只能以排隊的方式支持阿布泰:「咁實有(針對)㗎喇,所以我哋唯一可以做到嘅嘢,都係咁做,一齊排隊。」

對於有中國網民在微博上「睇死」,她則相信港人能做到:「有信心,一定有信心,就算我哋每一個人就算買一兩件貨品,咁但係我哋香港人咁多喎,我哋咁多人去支持喎。我唔相信香港人淨係買一兩件貨品咁。咁多人,大家一齊努力。」

10歲童稱支持阿布泰「好正義」

陸太今天帶同10歲的小朋友來到阿布泰,指「睇咗新聞,覺得有啲嘢,香港人就做番香港人嘅嘢啦」,帶同小朋友,是希望小朋友知道社會在發生甚麼事,希望「大家用番個良心出嚟做嘢」。陸小朋友被問到會否感謝父母讓自己認識社會的情況,他點頭贊成。雖然已排隊近半小時,陸小朋友亦指「唔辛苦」,認為大家排隊支持阿布泰「好正義」,亦認為自己在做正確的事件。

在分店外,有中年男子大聲叫「香港人加油」,亦有在排隊的巿民和應,大叫「加油」。有在店外經過的小朋友,問父母為甚麼阿布泰外大排長龍,母親回答指「(因為)香港人太睇唔過眼喇」。另有一名路過的中年男子,大叫「凡是敵人反對的,我們便擁護。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner