李八方online︱林鄭昔想炒晒劉江華蘇錦樑 今sell民建聯治港「人才」培訓班博連任

更新時間 (HKT): 2021.04.11 15:01
林鄭自薦分享「當特首的苦與樂」。

立法會前主席、民建聯創黨主席曾鈺成去年10月喺港台節目《鏗鏘說》透露,特首林鄭2017年當選特首後同佢會面,其間好唔客氣地直指民建聯搞咗咁多年,都未能為政府培養人才,更話對時任民政事務局局長的劉江華同商經局局長蘇錦樑嘅表現都唔滿意,但若兩個都炒晒,會令民建聯會難堪,所以姑且留返一個。

事隔近5年,林鄭唔知係「覺今是而昨非」,定因為好快又到特首選舉,今日喺Facebook出po幫民建聯做免費宣傳,呼籲「未來治港人才」報名參加民建聯主辦嘅「政道──治政理念研習課程」。不在民建聯廿名主講嘉賓之列嘅林鄭又話欣然接受參與主講,正構思講吓「當特首的苦與樂」,從而「帶出管治的理念和實踐」。

其實林鄭早前接受民建聯主席李慧琼訪問時,已面不紅耳不熱咁話要為從政人士提供三個「貼士」,包括:堅守原則、以人為本,「接地氣」聽巿民聲音同平衡各方意見。而林鄭嘅「管治的理念和實踐」,唔使佢講,相信港人已經十分清楚,有時仲連建制派都炮轟林鄭嘅施政添,唔知佢嘅自信心係點樣建立嘅啦?

林鄭又借題發揮,話過往接觸過唔少對參政卻步嘅有能之士,希望經「改善」嘅政治環境會改變佢哋嘅態度,指特區政府正加強保障個人私隱,應該可以消減佢哋擔心被「起底」或惡意造謠攻擊,甚至影響家人嘅顧慮喎。

回應是否再選特首 葉劉:冇時間考慮 目前言之過早

而曾經兩度參選特首都因為提名不足而要放棄出戰嘅新民黨主席葉劉淑儀接受now新聞台訪問時話呀,新制度之下,選特首要喺選委會五個界別攞到提名係更合理:「總唔能夠只靠工商界支持,就唔理會社工界,唔能夠咁樣嘅,所以我覺得5個界別都要攞到15票係合理嘅」,至於新制下仲有冇興趣選特首?佢冇否定,只稱:「呢個問題言之過早,目前冇時間考慮」,但佢相信新民黨喺選委會有一定嘅入場券,仲話近日多咗專業人士查詢,了解新機制下嘅從政渠道添。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner