李八方online︱紫荊黨招收黨員禁雙重黨籍 要求申報係咪功能組別選民

更新時間 (HKT): 2021.04.11 19:28

新選舉制度之下,北京為唔少新香港人提供從政「空缺」,被認定以「新香港人」為主嘅建制新政團「紫荊黨」相信有位落腳,該黨嘅總裁黃秋智接受now新聞台訪問時都話呀,新選舉制度修訂方案令佢哋個黨參政空間更大,表明會跨界別吸納唔同黨員,更精準咁吸納未來可以參選嘅人,總之有能力參選時就會去馬;如果唔得就會支持其他黨派或同佢哋有同一理念嘅人去參選。

入黨須申報選民資料

紫荊黨其實成立咗一年幾,官方網頁日前先正式上線,除咗有創黨人李山同黃秋智嘅合照,亦指兩人係喺去年3月1日維港一艘紫荊號遊船上宣告成立紫荊黨。

網頁有提及個黨嘅核心主張同政綱,包括爭取一國兩制下一個「五十年不變」同推動「有香港特色」嘅民主政治等,同時上載入黨申請表,訂明年滿18歲嘅香港居民,只要認同該黨建黨宣言同宗旨,有志於參政、議政,熱心社會事務,就可申請入黨;但表明若成為黨員,就唔可以有其他香港註冊的政黨嘅黨籍,唔知共產黨係咪豁免?

睇返黨員分為兩類,包括「紫荊之友」同正式黨員;除咗要求申請人提供個人資料,仲要求申報選民資料,包括係咪功能組別選民同有冇參選經驗。

本身係紫荊黨創黨人之一嘅中播控股董事長黃秋智早前喺now訪問中直認,至今黨員不足100人,只係涵蓋金融工商同部份專業界,唔確定會唔會派員角逐選委或立法會。佢自稱係政治素人,創黨唔係要同現有建制派競爭,強調成立時冇向任何人「報備」、亦冇任何人可唔可以成立。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner