蘋聞追Click︱麻雀館停業逾200日 冀打科興換開業:以必死信念搵命博

更新時間 (HKT): 2021.04.11 00:01

武漢肺炎疫情一波接一波,近日終稍見平穩。復活節假期,泳池、主題樂園等地均重新開業,不過酒吧、卡拉OK及麻雀館等,至今仍未能開業。有麻雀館東主指,過去一年斷斷續續停業逾200日,每月淨蝕數十萬;亦有老員工需借貸度日,為求可盡快復業上班,78歲高齡亦接種科興疫苗,形容「以必死嘅信念搵命博」。

政府去年4月1日,首次刊憲要求卡拉OK及麻雀館停業14日,開展長達一年、斷斷續續逾200日的停業政策,其間橫跨聖誕、農曆新年及復活節檔期。酒吧、卡拉OK、麻雀館業界在復活節假期間發起接力絕食,香港麻雀娛樂公司主席張家寧亦有參與。

堂堂麻雀館東主,紮營坐在政總對開橋底絕食,「夜晚呢,呢度風好大,日頭又好曬,唔係好滋味㗎真係!」自言不及年初甘浩望神父為難民絕食11天般偉大,「我哋真係好卑微」,明言行動是始料不及,「幾個月前我諗都無諗過要行呢步」。但隨停業日子越來越長,便決定與其他仍需停業的業界一同抗議。

張家寧的麻雀館1969年起便在灣仔駱克道開業,2013年從家中長輩中接手管理,同一條街還有不少行家,建構銅鑼灣、灣仔一帶的夜生活風景。最初政府的新聞公報,要求麻雀館停業14日;怎料墮入「14日輪迴」,往日風光日子不再,變成月蝕數十萬,張形容「未試過蝕得咁淒涼,沙士都無咁淒涼。」

除了小部份會計及清潔員工外,麻雀館的員工均停薪留職,老員工就更被殺個措手不及。廿多歲入行、今年60多歲的禮哥,是麻雀館經理,每個停業的14日,禮哥都做好準備參加檢測,好讓麻雀館復業後可即時復工。

「佢話打疫苗,我就一早嗱嗱聲去報咗去打疫苗喇!我都唔驚啲乜嘢。」問及是何種疫苗,禮哥答得爽快,「科興囉!我過幾日打第二針喇!」張家寧補充,他店內大部份員工為了盡快復工,均決定接種疫苗,「有啲老臣子話,我想開工,我搵命博都唔怕,有個78歲都打埋科興,你諗吓我哋……以一個必死嘅信念去希望復業」。

不過禮哥的願望仍未實現,麻雀館多月來未復業,禮哥形容生活變成「瞓醒覺就淥個公仔麵食吓,去公園行吓。」沒有薪金之餘儲蓄亦將近耗盡,近日要向親戚借五位數現金周轉,「又要交租、燈油火蠟、煤氣電費……嗰啲唔爭得㗎嘛!」

麻雀館較年輕的員工,亦同樣面對財政困境。40歲的康仔,形容現時是「望天打卦」,工種難以轉工,金錢上靠同居女友協助,「以一個男朋友或者一個男性嘅角度去諗,始終都叫做攤大手板,唔係咁好。」

眼見不少地點如主題公園及泳池泳灘,在復活節假期已正常開放,甚至逼滿遊人,張家寧指「泳池個感染機會係一定大過酒吧同麻雀館,麻雀館完全無試過大爆發,我覺得有啲唔公平。」過去張家寧曾先後兩次與政務司司長張建宗會面,換來結果是張建宗表示理解及同情,但麻雀館仍未能復業。

為做好準備重新開業,張家寧指進入麻雀館的客人需以安心出行或填表登記,填表者亦需在遮掩身份證號碼的情況下,確認客人填寫名字與身份證相符,「唔係填米奇老鼠」。每位客人入場時亦需先以消毒搓手液搓手,店員亦會在客人打麻雀前,先以消毒劑清潔麻雀。張家寧指,業界只希望盡早復業,亦希望政府可以作出停業賠償。

食衞局回覆《蘋果》指,會不時檢討措施,亦會與業界保持緊密溝通。至於長時間要求麻雀館停業的原因為何,局方就沒有正面回應。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner