撐阿布泰︱連日現長長人龍 排隊市民播《榮光》籲港人無懼紅線

更新時間 (HKT): 2021.04.11 23:26

黃店阿布泰生活百貨,日前被海關大規模扣貨,巿民為了表達對海關選擇性執法的不滿,來到各區的分店「遍地開花」,令分店外出現人龍的「阿布泰現象」。事過兩日,巿民的熱情及憤怒仍未消減,仍有大量人流到不同的分店光顧,令本來舖面積較小的阿布泰分店外出現人龍。

阿布泰位於荷里活廣場的分店,下午3時左右,有約30人的人龍在店外排隊,有途經的巿民乎不太清楚發生甚麼事,「咩料呀,有豬肉分呀」。

諷海關「公關做得幾好」

不願上鏡的香港人先生,在阿布泰外排隊時,播放歌詞版的《願榮光歸香港》,有一起排隊的巿民感動稱「多謝」。香港人先生指,自己只是「鐘意聽歌啫」,更笑指自己只是好像「巴士啲廢老」,將自己喜歡的歌播放出嚟。他又強調自己不是在「煽動」他人,指「好多歌詞嘅內容,係任人去詮釋㗎啫」。在日益減少的言論空間,他呼籲港人不要因恐懼而作自我審查:「如果係咁擺紅線,咁我哋防唔到㗎嘛」,又指希望「可以喺安全嘅範圍裏面,去自己保持住自己嘅心境」。

街坊李先生連續第二天來到阿布泰,昨日購買「香港製造」的口罩後,今日又再買泰國特色零食,指是要支持阿布泰。對於今日分店外仍有人龍,他直言沒有料到港人的毅力:「ok(開心)㗎其實,估唔到我哋都仲咁(堅持),無諗過㗎。」

他昨日來到購買印有「香港加油」標誌的紅酒,指是想在還有這樣的自由時支持:「唔知聽日咩事㗎其實,真係,所以盡量支持吓囉,難得(仲)有機會⋯⋯(透過消費支持係)唯一可以做嘅嘢囉,同埋合法㗎嘛。係㗎,好多嘢都唔可以做,咁依啲,買嘢咋嘛。」有網民笑稱,海關的執法「幫倒忙」,為阿布泰免費作宣傳,他則笑稱「公關做得幾好呀!」

「連會員都做埋」

不願上鏡的秦先生購入多盒「香港製造」的口罩,看到長長的人龍,同樣沒有料到有如此長的人龍,相當感動。他在來到前,沒有特意看還有甚麼貨品售賣,稱自己純粹是想來到阿布泰消費,支持阿布泰:「其實我都無特別上網睇阿布泰仲有咩貨賣,幫番啲黃店。」他又笑言,自己「連會員都做埋」,以後會更常光顧。

周日的康怡廣場,人流本來已不少,阿布泰的分店鄰近電梯,不時有帶着年幼子女的父母經過。充滿好奇心的兒童,不時會問父母為何店外有長長的人龍。有小朋友因為等候多時,問媽媽為何要排隊,母親回答稱「好多人都想好想幫襯、支持依間店囉,因為依間店嘅老闆叔叔做咗啲好正確嘅嘢」。有年輕媽媽經過時,主動停下向年幼的兒子解釋阿布泰被海關大舉搜查之事,其後小朋友主動問母親是否可以進內「幫襯」,指想要支持「啱嘅嘢」。

「筋肉人」先生,來到阿布泰買了逾1,300元的貨品。他平日戴的中碼口罩缺貨,即使不知道是否合用,亦照樣購買多盒大碼口罩:「其實唔知(啱唔啱戴)㗎 ,咁總可以畀人嘅」,指來阿布泰的巿民,其實重點不在購買貨品,而是在於支持被打壓的阿布泰:「我諗大家都會相信,買乜嘢唔係重點。」

盼林景楠及港人「撐住」

他對海關的選擇性執法相當不滿,指「唔可以淨係對一間㗎嘛,應該每一間都查,如果係每一間嘅問題,就每一間執法。」看到「懲罰」阿布泰的人龍,他說很感動,坦言沒有預料到港人的堅持,「喺唔同嘅情況,好似好難再有機會喺啲大嘅事上表達,係啲小事上,都見到大家唔會灰心、唔會放棄。我覺得係會聰明去做囉,你硬碰硬未必得,希望有啲小事上面都會願意去支持、表達咁樣啦。」

他不贊成「抗爭運動已死」的說法,指「我諗大家都唔會唔記得大家所堅持嘅係啲乜嘢,同埋係任何嘅情況之下,都會用番自己嘅方法,去將自己未必可以好直接表達到嘅諗法或者追求去堅持」,又指只要理念沒有改變,大家仍然可以堅持下去,寄語港人加油。

盧先生早幾天因為要上班,未有來到阿布泰購物,今日一放假,旋即來到阿布泰支持。排隊約半小時,他指自己是要來做「環保嘢」:「睇吓有無啲無中、英文標籤嗰啲,因為我識泰文㗎嘛,環保呀嘛,唔好浪費」。被問及對海關早前執法的看法,他則冷笑指「無嘢講」,又指「懲罰」黃店是各有各做法:「各有各做法,每人心中都有自己一套」,寄語阿布泰老闆林景楠及港人「撐住」。

旺角分店外逾百人沿彌敦道排隊

記者傍晚約7時半來到阿布泰位於旺角荷里活商業中心的分店,店外有逾百人的人龍,更需排出彌敦道,場面相當震撼。雖然人流極多,需出動多位職員作人流管制,但巿民亦相當守規矩,部分更早有準備,帶同書本等物品,在排隊時消遣時間。

以《一秒拳王》台詞勉勵港人及林景楠

Louis今日再度來到阿布泰消費,他以《一秒拳王》的台詞勉勵港人及阿布泰老闆林景楠,指林景楠並不孤單,又勸港人一起努力下去:「唔係淨係台上面嗰個人喺度撐緊,好多後面嘅人都一齊撐緊,同埋嗰一秒,唔好睇少,嗰刻嘅決定已經可以做到好多嘢,可以改變世界,惟有都係要積極、努力囉,唔係點呀。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner