隔牆有耳:為連任變面 硬sell民建聯 
777請纓教「人才」(李八方)

更新時間 (HKT): 2021.04.12 02:00

手機用戶請按此放大圖表

特首林鄭月娥之前俾人爆過佢睇唔起民建聯嘅人,仲想炒晒民記出身嘅局長,但現今政治形勢唔同,林鄭唔知係「覺今是而昨非」,定因為好快又到特首選舉,噚日忽然同民建聯做免費宣傳,叫「治港人才」報名參加民建聯主辦嘅政治人才課程,仲送上門話肯做主講!

想主講「特首苦與樂」

立法會前主席、民建聯創黨主席曾鈺成舊年10月喺港台節目《鏗鏘說》透露,林鄭2017年當選特首後同佢會面,其間好唔客氣地直指民建聯搞咗咁多年,都未能為政府培養人才,仲話對時任民政事務局長劉江華同商經局長蘇錦樑嘅表現都唔滿意,但若兩個都炒晒,會令民建聯會難堪,所以姑且留返一個。

呢件事相信民記中人仲記得,但林鄭似乎以為可以當粉筆字抹咗去,佢噚日喺facebook出po,呼籲「未來治港人才」報名參加民建聯主辦嘅「政道──治政理念研習課程」,不在民建聯廿名主講嘉賓之列嘅林鄭又話欣然接受參與主講,正構思講吓「當特首的苦與樂」,從而「帶出管治的理念和實踐」。

其實林鄭早前接受民建聯主席李慧琼訪問嘅片段已經出咗街,佢面不紅耳不熱咁話要為從政人士提供三個「貼士」,包括:堅守原則、以人為本,「接地氣」聽巿民聲音同平衡各方意見。林鄭嘅「管治的理念和實踐」,相信港人十分清楚,有時仲連建制派都炮轟林鄭嘅施政㖭,唔知佢嘅自信心係點樣建立嘅啦?

林鄭又借題發揮,話接觸過唔少對參政卻步嘅有能之士,希望「改善」嘅政治環境會改變佢哋嘅態度,指特區政府正加強保障私隱,應該可以消減佢哋擔心被「起底」或惡意造謠攻擊,甚至影響家人嘅顧慮喎。

李八方

一格照片,一個故事,Follow蘋果Instagram!
BannerBanner