李八方online︱左報老屈少開會 鄺俊宇:連基本事實都搞錯!

更新時間 (HKT): 2021.04.12 14:05
鄺俊宇希望下次左報報道前可以先睇清楚資料。設計圖片

親共喉舌為咗抹黑民主派,可以去到幾盡?一篇由《文匯報》化名記者「郭家好」撰寫嘅文章,今日稱「踢爆」民主黨前立法會議員兼元朗區議員鄺俊宇去年加入區議會轄下3個委員會後,只出席咗全年16次會議嘅其中2次,再引述五毛留言寸鄺俊宇「最叻神隱」。

鄺俊宇向八方澄清,指《文匯報》連基本事實都搞錯,指根據元朗區議會官方紀錄,佢去年只加入交通及運輸委員會一個委員會,並喺今年先加入另外兩個,相信《文匯報》搞錯咗佢加入委員會嘅時間,以為佢去年已加入咗3個,因此得出去年16次會議只出席2次嘅謬論,對此佢不禁慨嘆:「去年我都冇入呢兩個委員會,點開會啊?」佢希望下次左報報道前可以先睇清楚資料。

對於去年喺交通及運輸委員會5次會議中只出席咗兩次,鄺俊宇解釋分別因為撞正立法會預算案辯論、民主派立法會議員總辭,以及由於武漢肺炎剛爆發,佢去咗幫街坊四出撲口罩。佢補充,元朗區議會喺2020年一共開咗7次大會,佢出席率係100%,更試過因為要趕返立法會同區議會開會,一日內喺金鐘同元朗來回3次,最終喺尖沙嘴攰到腳抽筋,有巿民忍唔住上前慰問佢有冇事,「一個撲開會撲到抽筋嘅人,竟然俾人話我缺席咗14次會,有冇搞錯?」而至今佢都冇收過《文匯報》記者來電核實資料。

區議員出身嘅鄺俊宇,一向緊張地區工作,佢最近除咗忙於處理區務,亦繼續瞓身跟進向來關心嘅動物權益議題,近日就喺元朗朗屏邨同義工四出奔走,搵緊一隻日前被一對情侶所養的狗咬傷後仍負重傷趕返去5隻貓BB身邊餵奶嘅貓媽媽,至今已搵咗足足3日。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner