李八方online︱國安教育街站派國產Level 1口罩 愛國者唔領情仲搣爛宣傳品

更新時間 (HKT): 2021.04.15 20:12
街站派發的口罩包裝寫明「細菌過濾率≥95%」,即BFE Level 1。原圖為讀者提供圖片

是日貴為「國安教育日」,梗係唔少得愛國人士擺國安街站賀一賀佢啦。除咗口頭上教育市民之外,呢啲街站都好識做㗎,又派口罩又派福袋咁,連埋一大堆國安宣傳品送晒出去,國家果然唔會待薄大家呀!

之不過咁,八方收到愛國讀者報料,國家似乎冇畀最好嘅嘢香港人喎。嗰位讀者喺觀塘翠屏邨一個街站度,拎咗份口罩同一堆宣傳品。啲宣傳品就其次啦,口罩最緊要,話晒係國家嘅一份心意。

點知睇真啲,嗰款口罩包裝寫明「細菌過濾率≥95%」,即係BFE Level 1,唔單止防唔到武肺病毒,連防細菌效率都唔係最高。再望埋生產商,原來又係國產口罩,由河北益澤醫療器械有限公司出品,聲稱喺疫情期間應急使用,可以呵護健康咁話喎。

係咪真係呵護到健康就唔知啦,但係位讀者見到款口罩咁水皮,即時唔敢用,感受唔到國家嘅愛之餘,嬲嬲哋仲搣爛埋啲宣傳品添呀。政府明明好重視國安同防疫喎,點解會容許街站派倉底次貨㗎?防唔到疫事小,搞到市民嬲嬲豬,影響國家安全事大呀。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner