閹割選舉︱選民紛稱杯葛選舉:DQ真正想選的人 再投票冇意思

更新時間 (HKT): 2021.04.15 00:03

特區政府操刀大改香港選舉制度,全面改組立法會及選委會,立會大減地區直選議席至20席,亦採取措施「規管操縱、破壞選舉的行為」,任何人在選舉期間內藉「公開活動」煽惑他人不投票、投白票或廢票,即屬干犯非法行為,違例者最高可被判監3年。《蘋果》於街頭訪問了部份選民,不少人表示個人傾向杯葛未來選舉。

過去多數票投本土派的醫護人員葉小姐表示,打算於未來杯葛所有選舉。她批評,選舉制度經港府閹割後,成功入閘的候選人經過重重審查和掌權者篩選,「根本就係政府揀一啲人畀我揀,DQ一啲市民真正想選擇的人,嗰啲候選人未必代表到我,會幫我發聲」。

稱選舉期間避談投票傾向免墮法網

她指,早前參與民主派初選人士都因涉觸犯《國安法》被拘捕,「呢啲人已經冇得再參選」,她認為即使有「新血」持同一政治理念,能入閘參選的機會亦不大,「反正個選舉都咁不公,我再投票都冇意思」。她說暫時傾向保留選民資格,但選舉期間會避免在網上討論投票傾向,「政府要咁樣監管我哋都冇辦法,最多咪唔講」,避免誤墮法網。

年輕選民傾向不投票 批規管白票行動荒謬

大學生陳小姐亦傾向不再投票,認為修例後,議會再無法有效監察和制衡政府施政,「就算選到入到去,都做唔到啲咩,好似俾個制度玩緊咁,對選民同從政者都未必係好事,發揮唔到佢應有嘅作用」。對於政府擬規管呼籲他人不投票、投白票或廢票等行動,陳小姐直指荒謬,政府「做多咗囉,癲咗囉好似」,認為投票屬於選民的自由,「討論吓都要死咁,焗你一定要做某啲事,講吓都唔得」。

從事藝術工作的羅生亦傾向不投票,甚至考慮索性取消選民資格以示抗議,「不滿囉,成個政府都唔好」,不滿政府未經諮詢便重組議會制度。

選民嘆政局多變 對未來選舉持觀望態度

不過亦有部份選民對未來選舉持觀望態度。從事會計行業的黎先生過去多數票投民主派,會否參與投票要視乎候選人名單,「要睇吓揀唔揀到啦,揀唔到,就睇吓有咩方法反映到民意囉⋯⋯你明我明咪得,哈哈!(有咩方法?)大家feel吓」。不過,他亦質疑「真民主派」能否入閘參選,「睇吓邊位,參考過去一啲言論、政績、有冇轉過軚」。他慨嘆政治形勢日日都有變化,「可能遲啲又改,規定登記咗個個都要投票呢」,暫時未決定會否索性放棄選民資格。

大學生黎小姐亦表示,要視乎有哪些候選人入閘,再決定會否於未來選舉中投票,若有非建制派人士參選,會力盡選民責任,慨嘆「而家都冇咩做到」。她説自從本港實施《國安法》,「言論自由一早就冇咗啦」,對於政府進一步要求市民在選舉中噤聲已不感到意外,但不會因此變得政治冷感,「留意就一定會留意,始終香港係我哋屋企」。

但自由工作者葉小姐則表示會在選舉中投票,「點樣投,係咪喺上面寫啲嘢就另一回事,不過就梗係唔好投白票啦」。她批評,政府改革選舉制度「咁大件事,冇諮詢話來就來,雖然都覺得好迷惘,好似『你想點咪點囉』,但都覺得要留意、參與,香港人唔好咁易放棄」。居住在沙田區的她又對政府把沙田重新分作兩個選區感到奇怪,稱不明白政府進行此舉的基礎。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner