李八方online︱立法會流會不在席要罰錢 建制派玩自己?

更新時間 (HKT): 2021.04.16 12:33

大家真係相信立咗《國安法》、閹埋個選舉制度就集中精力發展經濟、改善民生?咪咁天真喇!有報道話建制派仲諗緊點樣收緊《議事規則》,例如針對立法會流會問題,考慮懲罰流會時不在席嘅議員扣人工、設定各個委員會人數上限,甚至話連議員衣著都管埋。其實將來嘅議會恐怕再冇民主派,咁收緊《議規》其實係咪建制派自己玩自己呢?難怪有建制派同八方講,其實建制派對有關建議係有爭議嘅。

立法會上個月尾先至收緊咗《議規》,包括限制各種議案嘅辯論時限、發言人數等。有報道話,議事規則委員會已經傾緊點樣再收緊《議規》,例如罰流會時不在席議員當日人工,大約係3,400蚊,又諗過不如叫人大再釋法,解除《基本法》有關立法會會議法定人數為一半嘅限制。

回歸以來建制派都坐擁一半以上議席,佢哋坐齊就無可能流會。將來立法會去到90席,當中甚至至少80席都係建制派,若果流會真係要罰錢,咁建制派都要畀唔少。

報道亦提到,議規會諗住限制一般委員會人數上限為15至20人,而包括大主席以外所有議員嘅內會、財會都要減人數,但減幾多就未定。

實情啲委員會多人加入就係因為涉及爭議內容,咁限制人數又點令將來聲稱更有「廣泛代表性」嘅立法會反映到個代表性呢?再者立法會主要工作一係立法、二係批錢,財委會仲要係立法會3個常設委員會之一,咁都要限人數,當初何必加到90席?

仲有一項收緊《議規》幾好笑,就係話要規管男議員衣著,唔畀著T裇短褲波鞋,報道又引述不具名建制派話咁樣係「玩自己友」。原來當個議會認受性跌到新低嘅時候,建制派諗到要做嘅事就係要啲議員著靚啲。報道最後話成批收緊《議規》嘅建議打算今年6、7月畀內會,下屆立法會開始實施。

不過有建制派同八方講,其實上述建議係有爭議嘅,譬如話限制內會、財會人數咁,有啲人就贊成唔使咁多人去開內會、財會,但亦有啲人覺得,財會始終係有批錢嘅實權,若果只係俾部份人入到財會,咁入到嘅人就好似變咗「超級議員」,比其他入唔到嘅議員勁啲。又譬如流會時不在席要罰錢咁,呢點仲有待秘書處搵吓外國案例,而以日薪3000幾蚊咁計算罰款,亦唔係人人同意。實情成個立法會都已經係建制派玩晒,都係嗰句:佢哋鍾意點咪點咯。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner