閹割選舉︱職工盟搞「垃法會」模擬投票 3選項:大陸財閥、忠誠廢物及扮反對派

更新時間 (HKT): 2021.04.17 19:37

北京出手閹割香港選舉,政府日前公佈修改選舉制度細節,禁止選舉期間公開煽惑他人不投票、投白票或廢票。職工盟今日(17日)擺街站,舉行「垃法會選舉模擬投票」,目標收集200張選票,反映市民對新選舉制度的意見。有市民笑言,自己在選票中寫上粗口,亦有市民指擔心自己個人資料被盜用「造票」,因此來屆立法會選舉將會如常投票。

3大選擇:大陸金融財閥、忠誠廢物及扮反對派

職工盟於下午4時許到旺角朗豪坊擺街站,舉行「垃法會選舉模擬投票」,並提供「大陸金融財閥派」、「忠誠廢物派」和「扮反對派」供市民選擇,有市民在選票上劃走所有選項,亦有人直接寫上「大交叉」。

職工盟亦向市民派發本月的《工盟團結報》,當中有現正身陷囹圄的主席吳敏兒之獄中信,以及日前判囚的秘書長李卓人所撰寫的文章。

職工盟組織幹事吳冠君指,今天街站希望「配合中央意思」,「宣傳」完善選舉制度後的立法會選舉,選票上的3個選擇,代表着將來議會剩餘的議席選擇。他指,希望可收到200張選票,並將於今晚在社交網站上公佈民意結果。

「五一」勞動節各區擺街站代替遊行

對於不少市民已揚言會杯葛選舉,吳冠君估計,今屆立法會仍然有大批市民會投票,「但係無從估計有幾多票係有效啦,始終呢樣嘢又咁新,香港人又未適應,又會好擔心,啲選擇又唔係咁鍾意」。

現時《國安法》動輒得咎,吳坦言,職工盟擺街站時亦有所擔憂,但街站始終是公民權利,不應輕易放棄,「一個市民喺公共空間表達佢嘅政見,無論乜嘢派別,支持定反對政府,其實都有權利去講。你唔可以上綱上線就話佢違反《國安法》,我覺得好離譜」。

他續稱,港人應享有言論自由、投票等權利,「不受恐嚇、唔會因為你講嘅嘢而擔驚受怕,亦係免於恐懼嘅權利。如果政府要剝奪嘅話,我哋覺得係好可悲」,因此將來會如常擺街站表達訴求。

以往職工盟於「五一」勞動節均會舉辦遊行,吳指,由於現時舉辦遊行已不會再獲批,故會於全港多區擺街站,宣揚勞工權益議題。

李卓人入獄 戰友:強權管治只屬自欺欺人

職工盟秘書長李卓人昨(16日)因8.18流水式集會案被判囚1年。吳冠君指,昨日大家聞訊後非常傷心,但相信李卓人能堅持下去,「阿人奮鬥咗咁多年,一定會堅持到、拼到落去,會精精神神咁出返嚟同我哋再一齊行」。

他批評,審訊反映港人已無任何政治參與空間,「議會又好,政府又好,都唔係民意授權,連遊行都扼殺埋,其實即係想香港市民全部噤聲,表面上對你(政府)恭恭敬敬,唔好講任何反對聲音」,形容政府以此等強權管治只屬自欺欺人。

「投返自己有智慧嘅一票」

25歲的黃小姐參與模擬投票活動,她笑言自己只在選票中寫上一個粗口單字,「3個(選擇)都想寫個『X』字,咁咪寫一個大嘅『X』字囉!」她笑言來屆必定會投票,「投嚟支持我哋個選舉制度呀嘛!」

其男友、26歲的黎先生亦指會投票,「因為唔想有人拎咗我啲資料投畀建制派」,因此會現身投下「廢票」。對於香港選舉制度被閹割,兩人曾認為「不如你玩晒啦」,但亦希望可「盡做」,「我哋都無乜嘢可以做,咁不如投返自己有智慧嘅一票」。

「佢唔怕難睇,我哋咪令到佢難睇囉」

高先生亦有參與投票,「佢哋(政府)要我投咩咪投咩囉,都無得揀㗎啦」。面對已被扭曲的選舉制度,他指自己仍然會投票,「佢驚我哋投,咁又突然搞到我好想投,佢唔開心吖嘛,我想佢唔開心」。

他形容人大及政府改選舉制度是「輸打贏要」,前年區議會選舉民主派陣營幾近大獲全勝是關鍵,「本身建制派喺個制度上面都無得輸咁滯,佢都仲驚佢哋會輸,改到佢擺到明贏硬,咁佢唔怕難睇,我哋咪令到佢難睇囉」。

「唔好因為制度唔啱你就唔玩」

24歲、讀政治學出身的李小姐指,自己投下「忠誠廢物派」,「而家議會只係得返一種聲音,連唔順從嘅聲音都扼殺埋,所以呢個選項係最fit」。她指,自己於來屆立法會選舉,亦會盡公民責任投票。

對於不少市民呼籲杯葛選舉,她指制度上的問題不是一朝一夕可以解決,「制度還制度,責任還責任,唔好話因為個制度唔啱你就唔去玩,所以我對唔投票呢個說法有保留」。

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner