47民主派被控︱專訪︱天天當「拆信師」探監像默書 尹兆堅議助:冇諗過幫人嘅老闆最終還柙!

更新時間 (HKT): 2021.04.18 00:05

由2015年開始跟隨民主黨尹兆堅的助理鍾嘉欣,在尹兆堅還柙後每天上午忙於拆信,然後把一封封寫滿感謝、打氣的信件寄給尹。沒有老闆的日子近兩個月,原來才是認識老闆的最佳時刻,得人恩果千年記,多年前的受助個案,一個個回來問暖。看着信件,鍾嘉欣感嘆,從政、幫人多年,下場原來是被收押、自由被剝奪。若有天失去議員資格,鍾嘉欣說,只要尹一開聲,願意將來當義工。

記者:姚國雄

自從尹被還押後,鍾嘉欣每天上午也變「拆信師」,為免部份信件內容敏感令尹招致不必要麻煩,故她要閱讀每封信,把「入到」、「入唔到」的信件分類,然後將如精神食糧的信件送入高牆:「有啲市民會寄一啲做運動嘅資訊畀阿尹,如果有經文都會寄。」

閱讀信件,是重溫尹兆堅的從政、助人歷史。有些人,本來尹這一世人或不會再遇上,但因為這宗政治大審判,卻決定寫一封答謝、打氣信。住在馬灣小島的居民,記得尹兆堅曾為島上居民的交通問題發言、爭取;住在劏房的小市民,看見尹常為房屋問題出頭,道出他們的心聲……這些受助群眾,多年來把小事記在心底,在尹有難時,提筆送慰問,當中點滴令鍾嘉欣感動不已。

「嚟聽審嘅街坊喊得好緊要」

即使素未謀面,有市民深感尹對香港的付出,也送來信件:「有啲人話『我唔識你(尹),但眼見你為香港付出,希望你撐住』,我哋都會照寄畀佢,想佢知道,有啲人唔識你都會叫你加油。」不認識的人有情,認識阿尹的人更有義,那場大審判,葵青區的街坊比助理們更快哭:「嚟聽審嘅街坊喊得好緊要。」

整場厄運,是見證香港人人性的一刻,鍾嘉欣說,雪中送炭的比想像中多,街坊有時人會送上食物問暖,開街站收集打氣說話時,平日冷漠的街坊,也露出熱心一面:「有啲人會埋嚟,叫你加油頂住,但可能佢平時以往經過十次街站,都唔會同你講嘢。」

替尹工作近6年,見證老闆高高低低,鍾嘉欣陪尹兆堅由葵芳打到金鐘,又由金鐘退回葵芳,如今退至收押所,她來了個總結:「真係好唔抵,冇諗過從政、幫人嘅老闆同做實事嘅人,最終要有還柙呢個下場,每次諗到呢度好難受。」

「只要呢度要幫手,我哋會返嚟做義工」

傷心的空間其實不太多,因為每天也有事忙。她探望尹的15分鐘,八成時間也在談工作安排:「有啲個案佢仲係緊跟,佢都會問進度,佢會問:『跟成點?有冇搵邊個幫手?幫成點?幫完未?』」鍾嘉欣說,有助理比喻,探監其實是在默書:「我哋有同事話,(探佢)係去默書,準備一個默書嘅心情入去,因為佢有一張紙仔,會話『我有十點,你要抄低,得未?』」

還柙如常生活、工作,就是抗擊政權的最好方法。尹常對他們說,只要外面頂得住,他便會頂得住,着別人放心:「佢嘅心靈好強大,佢嘅思想好堅定。」

鍾嘉欣強調,尹兆堅未失議席前,「做到幾多得幾多」,即使日後失去議席,由頭開始揼石仔,只要時間許可,將來會仗義幫助這位好老闆:「即使將來呢度(議席)冇得做,只要呢度要幫手,我哋會返嚟做義工。」

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner