隔牆有耳:北韓禁白票 香港只差一線(李八方)

更新時間 (HKT): 2021.04.19 02:00

港府之前公佈「完善」香港選舉嘅條例草案,入面引入呼籲人投白票、唔投票都係犯法嘅新規定,但又話選民投白票唔係犯法,好多政界人士、學者、大狀都問,點解叫人做唔係犯法嘅嘢會變咗犯法?佢哋同時話冇聽過外國選舉法有啲咁嘅規定,唔知係咪香港先有呢啲限制,但有facebook專頁發現,原來唔係只得香港話呼籲人投白票犯法,真係有個國家投白票都犯法,呢個國家係邊度?原來係北韓!

投廢票當叛國

FB專頁Goodbye HK, Hello UK引述兩篇分別係《經濟學人》同BBC有關北韓選舉制度嘅報道,原來北韓選區每區只有一個候選人,全部候選人由執政勞動黨之下嘅祖國統一聯盟挑選,而選舉日全國17歲以上嘅人士必須到票站投票以示愛國,因為候選人只得一個,選票上只有一個格仔,任何人投白票或廢票都當叛國。北韓選民都可以投反對嘅,不過要當眾將選票投入另一個票箱,即係全部人都見到投反對票。

專頁又引述報道,北韓2019年選舉嘅投票率去到99.7%,完全係民主選舉嘅「典範」,香港竟然可以係投票規範上直追北韓,真係難得!

李八方

一格照片,一個故事,Follow蘋果Instagram!
BannerBanner