隔牆有耳:收歌詞先知「走在時代末端」
吳政亨還柙學唱新歌(李八方)

更新時間 (HKT): 2021.04.19 02:00

越來越多爭取民主自由嘅香港人被囚高牆之內,亦都因為咁,同時激發大家搵嘢做,其中一樣就係化身寫信師。喺初選案47子之中,吳政亨(網名李伯盧)名氣雖然算係較低,原來《蘋果》送暖高牆欄目都收到唔少讀者寫信畀佢,亦有唔少市民直接寄信畀佢之餘,仲喺信入面抄寫歌詞,呢個動作本來係想幫吳政亨解悶,點知佢「走在時代嘅末端」,好多歌都唔識,結果令佢有新嘢學。

網上群組「吳政亨(李伯盧)關注組」轉述吳政亨話,多謝大家咁踴躍寄歌詞入去,雖然佢以往有玩改歌詞,但佢原來係「走在時代嘅末端」,因為差唔多所有寄入去嘅歌詞佢都唔識。雖然係咁,佢話「但係學下新歌都冇壞嘅」。

曾二創鄭秀文九十年代飲歌

關注組同大家提供揀歌小貼士,話知道以前吳政亨改歌詞時,有改過鄭秀文首《薩拉熱窩的羅密歐與茱麗葉》同《陰天》,呢兩首歌都係嚟自九十年代,如果係同期嘅歌,吳政亨應該會識,當然如果係一啲好hit嘅歌佢都應該識啦!不過,有歌詞其實係未夠㗎,關注組仲提大家,寄歌詞嘅同時候仲可以連埋數字譜,咁就算吳政亨唔識唱,都可以跟住譜哼到出嚟,如果真係冇譜,吳政亨就要當睇詩咁睇囉。

李八方

一格照片,一個故事,Follow蘋果Instagram!
BannerBanner