李八方online︱《文匯報》屈天文台 訛稱超強颱風逼港 實情千公里外掠過

更新時間 (HKT): 2021.04.20 06:48

警務處處長鄧炳強日前講過,「假新聞」同國家安全有直接關係。的確,台灣早有《氣象法》,禁止坊間亂報天氣消息,避免社會不必要恐慌。不過自稱「文以載道」、中聯辦旗下嘅《文匯報》,竟然在網站發佈不實資訊,誣衊天文台「預測」超強颱風「舒力基」逼港、殺入800公里範圍內!但實情係,天文台只係預測個風最大機會喺1,000公里外掠過。

被批矛盾錯處多 不堪入目

民間氣象網站「香港天氣資訊中心 HKWIC」喺Telegram,以〈文匯報新聞錯誤百出〉做標題出咗個post,狠批左報造謠。個post話,天文台從來冇講過超強颱風「舒力基」會逼近本港,亦從來冇預測個風殺入本港800公里內,更加冇預測4月18日朝早嘅多區氣溫下降到18°C左右,質問左報「到底係咪真係睇住天文台預報去撰寫新聞?」

呢個post除咗批評《文匯報》個「報道」完全不正確、錯誤兒戲,仲話啲錯處多到不堪入目,亟待改善:「上一秒稱進入800公里範圍,下一秒卻稱『過門不入』,文章矛盾,寫文記者返工發夢。」對於「報道」臨尾話「受『此』影響,香港今晚入夜後,氣溫會下降」,個post亦都鬧爆咁寫係語意不清,質疑呢個「此」字,究竟係講緊「達強風程度的偏東氣流」、「覆蓋華南的一道廣闊雲帶」,定係「超強颱風舒力基」呢?

稱天文台料多區18°C 實情僅預測市區21°C

八方禮拜一深夜去《文匯報》網站,仲搵到呢篇「報道」,未有更正;標題仲係寫「天文台指超強颱風『舒力基』周三逼港」,圖說都話「天文台料超強颱風『舒力基』周三踏足香港約800公里內」,而內文仍然寫個風「周三(21日)踏足香港約800公里內,但會『過門不入』……受此影響,香港今晚(18日)入夜後,氣溫會下降,多區明早(19日)氣溫料降至18°C左右」。

翻查天文台資料,八方發現天文台4月18日預測第二朝市區氣溫只係跌到21°C,而唔係《文匯報》所講嘅預測多區跌到18°C。天文台當日亦只係預測,舒力基會橫過菲律賓以東海域,最大機會喺香港1,000公里外掠過,而唔係《文匯報》所講嘅會進入本港800公里內。天文台回覆八方查詢嗰陣,亦確認當日只係講過個風會橫過菲東海域,同預測當晚同第二朝市區最低21°C。八方寫電郵向《文匯報》編輯查詢,截稿前未獲回覆。

鄧炳強日前講過,對於嘗試用假新聞危害香港安全嘅人,警方會全面調查,一有證據就會拘捕同檢控;保安局局長李家超亦話要處理「假新聞」問題。家陣《文匯報》篇報道錯漏百出、資訊不實,老屈天文台預測超強颱風「逼港」,斷正咁滯,但八方暫時未見報道修正或下架,唔知鄧炳強同李家超會點跟進呢?

-----------------------------

蘋果初心不變!26周年「撐蘋果Tee」預售:

你的優惠訂購海外訂購按此

-----------------------------

支持蘋果深度報道,深入社區,踢爆權貴,即Like蘋果專題及調查組FB專頁

一格照片,一個故事,Follow蘋果Instagram!
BannerBanner