隔牆有耳:立會草案求其 驚現「媒」氣、機「埸」(李八方)

更新時間 (HKT): 2021.04.20 02:00
■政府提交嘅修改選舉制度綜合條例草案驚現「中華媒氣」同「機埸管理局」 。

立法會為配合政府快快通過「完善」香港選舉法例草案,正快馬加鞭開快車,但快還快,始終係正式法例,都唔可以求求其其、錯漏百出,連交畀立法會嘅草案有錯字都唔知。

話說噚日立法會審議呢條草案,包括熱血公民鄭松泰在內嘅議員都發現政府交出嚟嘅文件有唔少錯漏,好似將屬於選委會工程界選民嘅香港中華煤氣有限公司寫成中華「媒」氣有公司,又將機場管理局寫成機「埸」管理局。有建制派議員擔心,呢啲手民之誤日後會唔會影響相關機構嘅選委資格?政制及內地事務局常秘鄧忍光回應話,如果發現草案有手民之誤,當局會以修正案方式進行處理。

政制局答唔出全國性團體分別

除咗呢樣蝦碌嘢,「姐姐」新民黨葉劉淑儀會上問政府,屬全國性團體香港成員選委嘅「中華全國歸國華僑聯合會香港特別行政區委員」,同「中華海外聯誼會香港特別行政區理事」有乜具體分別?呢啲團體係政府定,但政制局首席助理秘書長江嘉敏竟然講唔出具體有乜唔同,只係話兩個會係分別唔同嘅會嚟嘅,即係有答等於冇答。

李八方

一格照片,一個故事,Follow蘋果Instagram!
BannerBanner