隔牆有耳:紅線多到嘔 褚簡寧辭職長唞(李八方)

更新時間 (HKT): 2021.04.21 02:00
褚簡寧

香港嘅新聞自由同法治一樣已經畫上句號,國安法生效後周圍都係紅線,唔少資深傳媒工作者好冇癮,好似印裔資深傳媒人褚簡寧,佢嘅最新動向原來係辭晒多個現時嘅傳媒工作崗位,包括TVB嘅《清心直說》(Straight Talk)同《睇新聞.講英文》(News Watch English)主持,連喺《南華早報》同《信報》嘅專欄都唔會再寫。

行山煮飯睇Netflix

褚簡寧講到一口流利廣東話,過去立場被認為親建制,但前年反修例運動開始唔再撐政府,仲不時喺專欄批評林鄭,點解今次咁撇脫?唔通關國安法事?八方問佢為乜唔寫專欄,佢話𠵱家對住電腦唔知可以寫乜,政治嘢要考慮邊啲係紅線、邊啲唔係紅線,要諗一輪,諗唔到就情願唔寫好過啦。而且佢好多年冇放假,𠵱家開始每日行山、煮飯、睇Netflix,又計劃寫書分享擔任記者嘅經驗。至於會唔會離開香港,褚簡寧話原本計劃去美國探望家人,但擔心隔離都要唔少時間,或者等隔離政策取消先起行,所以佢至少未來一、兩個月都會留喺香港。

褚簡寧唔做《清心直說》節目後,會改由港台顧問委員會前主席、「梁粉」牙醫陳建強接手,相信大家聽唔到褚簡寧嗰種綿裏藏針嘅英文啦!

李八方

一格照片,一個故事,Follow蘋果Instagram!
BannerBanner