隔牆有耳:選唔選立會 白鴿9月扑槌(李八方)

更新時間 (HKT): 2021.04.23 02:00
■羅健熙話9月決定會唔會派人參選今屆立法會。資料圖片

自北京「完善」香港選舉制度後,民主派陣營究竟仲會唔會參加日後嘅選舉呢?好多都仲未表態,當中包括民主黨在內。民主黨主席羅健熙噚日同八方講,該黨會喺9月中召開會員大會,到時就會扑槌,決定個黨會唔會派人參選今屆12月立法會選舉。

羅健熙:房委會停職 「好差」

羅健熙話,北京一方面話改制並非要喺立法會「搞清一色」,但另一方面特區政府就冇放軟過手腳去打壓民主派。佢話,雖然目前唔多聽聞有黨員表示有意參選,但距離9月中仲有近五個月時間,相信可趁呢段時間畀黨友們討論一下,佢唔介意討論期間有「火花」,最緊要大家肯埋枱傾。

除此之外,羅健熙因涉及一宗刑事案件,被房委會建議暫停其建築小組委員會委員身份,佢話,如果房委會事前畀提示佢自行辭職,佢都會考慮吓,最終房委會只係出咗兩封信畀佢,一封講暫停佢嘅委員職務,一封就感謝佢嘅努力,令佢覺得房委會嘅處理方式「好差」。

李八方

一格照片,一個故事,Follow蘋果Instagram!
BannerBanner